İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 171 Hüküm no: 142 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafının nizam ustalığına tayin edilen Kabzımal Dimitri’nin esnafdaki alacaklarının tahsili için vekil tayini Mahmiye-i İstanbul’da kâin bi’l-cümle bakkāl esnâfının hâlâ kabzımâlları olan Sarıgörezli Sava v. Anaştaş nâm zimmî esnâf-ı merkūme Pazarbaşısı Süleyman Ağa ve Bölükbaşı Molla Abdi ve sâir mazbûtü’l-esâmî nüzzâr ve tüccâr ile bakkāl esnâfının hâlâ nizâm ustalarından Çarşambapazarlı İsak v. Kiryako ve Kıbleçeşmeli Kiryako v. Nikola ve İncirdibli Yani v. Kosta ve Fenerli Ananosti v. Hıristo ve Zindandelenli Kiryako v. Vasil ve yağcı bakkāllarından Balıkpazarlı Zaharya v. Yorgi ve sâbıkā Yazıcı Filibos v. Nikola ve Bozdoğankemerli Yako v. Yuvan ve Şehzâdebaşılı İstefan v. Bratamos ve Hocapaşalı Yovakim v. Simyon ve yağcı bakkāllarından Dimitri v. Panayot ve Veznecilerli Vasil v. Yani nâm zimmîler hâzır oldukları hâlde meclis-i şer‘-i hatîrde esnâf-ı merkūmenin kabzımâlları olup hâlâ nizâm ustası ta‘yîn olunan Mercanlı Dimitri v. Yani nâm zimmî muvâcehesinde hâzırûn-ı merkūmun tasdîkleriyle ikrâr-ı tâm ve takrîr-i kelâm edip mersûm Dimitri zimmînin esnâfımıza kabzımâl olduğu müddetde esnâf-ı merkūmenin emirleriyle bi’l-cümle makbûz ve ve masrûfunun hesâbını hâzırûn-ı merkūmûn ve sâir esnâfımız ma‘rifetleriyle sahîhan rü’yet eylediğimizde mersûm Dimitri zimmînin yed ü zimmetinde tüccârın gayrı esnâfımızın bir akçe ve bir habbe hakkımız zâhir olmayıp ancak mersûm Dimitri zimmînin kabzımâl olduğu müddetde bi’l-cümle esnâfımızın emirleriyle umûr-ı lâzımelerine masârıfından esnâfımız üzerlerinde zuhûr edip makbûlümüz olan elli bir bin guruş alacak hakkını mersûm Dimitri zimmî esnâfımızdan cem‘ ü tahsîl ve kendiye teslîme tarafından beni tevkîl ve ihâle eylediğinde ben dahi ba‘de’l-kabûl meblağ-ı merkūmu ber-vech-i muharrer esnâf-ı merkūmeden cem‘ ü tahsîl ve kendiye teslime ta‘ahhüd eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe sene 1246 Şuhûdü’l-hâl: Muhzırlar Kethüdâsı Hafız İsmail Ağa, Odacı Hüseyin Çelebi, Çukadâr Ali Ağa. Temme fî-hâze’l-makām es-Seyyid Abdurrahim el-kādı bi-Dârü’l-hilâfeti’l-aliyye nemekahü’l-fakīr ileyhi azze şânühû. [Mühür] Abdurrahim.