İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 172 Hüküm no: 143 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Aci Kosti’nin dükkânında mevcut eşyalarının satılarak bedelinin kayyım tayin edilen kardeşine teslimi Mefkūd defteri İstanbul’da Alacahamam kurbünde Çelebioğlu Alaaddin mahallesinde hamam karşısında vâki‘ Helvacı ve hekîm dükkânları beynlerinde kâin bir bâb şekerlemeci dükkânı ile İstanbul’da Kapan-ı asel zahrında Uzuncaova sokağında vâki‘ bir bâb kârgir mağaza derûnlarında bi’l-müşâhere müsteciren mütemekkin Aci Kosti v. Andon zimmî dükkân ve mağaza-i mezkûreleri bundan akdem mukaffelen terk ve ta‘tîl birle diyâr-ı âhara firâr ve gaybet-i munkatı‘a ile gāib ve mefkūd olmağla zikr olunan dükkân ve mağazanın kuflleri ma‘rifet-i şer‘le feth u küşâd ve derûnlarında mevcûd mütesâri‘ü’l-fesâd olan eşyâsı tahrîr ve semen-i misilleriyle âhara bey‘ olunup esmânı gāib-i mersûmun hâli mütebeyyin oluncaya değin yed-i emîne vaz‘ ve zikr olunan dükkân ve mağaza kendilere teslîm olunmasını dükkân-ı mezkûr derûnunda mevcûde gedik ta‘bîr olunan âlât-ı lâzıme-i ma‘lûmenin on altı sehm i‘tibârıyla yedişer sehmde on dört sehmin mâlikleri Şişeci Hayim ve Hurdacı Nesim veledey David Yahûdiler bâ-arzuhâl istid‘â etmeleriyle ol bâbda sâdır olan fermân-ı âlî-şâna imtisâlen savb-ı şer‘-i enverden mezûnen irsâl olunan Kâtib es-Seyyid Ahmed Rıza Efendi ma‘an meb‘ûs ümenâ-i şer‘den Çukadâr es-Seyyid İbrahim Edhem Ağa b. es-Seyyid Süleyman ve Muhzır Mehmed Çelebi b. Musa ile evvelen dükkân-ı mezkûra ve ba‘dehu mağaza-i merkūma varıp mersûmân Hayim [ve Nesim] Yahûdiler ve anaları olup âlât-ı mezkûrenin ber-i‘tibâr-ı merkūm mâ‘adâ iki sehmine mâlike olan Ester bt. İsak Yahûdiye tarafından husûs-ı âtîde vekîl-i müsbit-i şer‘îsi Mizrahi v. Avram ve mağaza-i mezkûrun bi’l-icâreteyn müstakıllen mutasarrıfı Dellâl Yuda v. İsak Yahûdiler ile şekerci esnâfının kethüdâsı Hasan Ağa b. Ali ve Yiğitbaşısı İbrahim Ağa b. Yusuf ve esnâfından Asmaaltı’nda es-Seyyid el-Hâc Süleyman Ağa b. ( ) ve Mustafa Ağa b. Hasan ve Alacahamam’da el-Hâc Mehmed Ağa b. Abdullah nâm kimesneler hâzır oldukları hâlde dükkân-ı merkūmun gedik mâlikleri asıl ve müvekkil-i mersûmûn ile mağaza-i mezkûrun mutasarrıfı mesfûr Yuda Yahûdi iltimâslarıyla evvelâ dükkân ve ba‘dehu mağaza-i mezkûrların kuflleri ma‘rifet-i şer‘le feth ü küşâd ve gāib-i zimmî-i mesfûrun dükkân ve mağaza-i mezkûrlar derûnlarında mevcûd mâlı olup mütesâri‘ü’l-fesâd olan eşyâsı tahrîr ve semen-i misilleriyle âhara bey‘ olunup esmânı gāib-i mersûmun hâli mütebeyyin oluncaya değin mu‘temed ve müstakīm olduğu bi’l-ihbâr zâhir olup kıbel-i şer‘den bi’l-kabûl kayyım nasb olunan gāib-i zimmî-i mesfûrun li-ebeveyn er karındaşı Şekerlemeci Mihal zimmî yedine teslîm olunan eşyâsının defteridir ki ber-vech-i âtî zikr olunur. Fi’l-yevmi’l-hâmis min-Zilka‘deti’ş-şerîfe li-sene sitte ve erba‘în ve mi’eteyn ve elf. Dükkân-ı mezkûr derûnunda zuhûr eden eşya: Kâğıt sepet Sagīr 3 aded Kebîr 23 aded 45 guruş, 60 para Ku[l]plu Venedik sepeti Sagīr 22 aded 22 guruş, 40 para Sagīr ve kebîr kutu 17 aded Fey 30 para 12,5 guruş, 30 para Bürüncüklü şekerleme sepeti 23 aded 301 guruş, 280 para Hurda oyuncak şekeri Sepet 1 aded 20 guruş Şekerli gurâbiye Fî 22, 50 Dürüm 9 guruş, 8 para Şekerleme taslığı 16,5 kıyye Fî 125 para 51,5 guruş 3 para Râhatü’l-hulkūm şekeri 21 kıyye 70 Direm Fî 122 para 8 guruş, 15 para Sahk şekeri 9 Çanak 15 guruş Gülbe şeker 8 Çanak 4 kıyye 15 guruş Def‘a Gülbe şeker 3 kıyye Sahk şekeri 1 kıyye 11 guruş Horasânî 2 kıyye 105 direm Fî 340 para 20 guruş 8 para Şekerli Anason 12,5 kıyye 100 direm Fî 115 para 36,5 guruş 6 para Nane ve tarçın ve karanfil şekeri 4 kıyye Fî 236 para 23 guruş Tarçın şekeri direm - 4,5 guruş 7 para Frenk şekerlemesi 5,5 kıyye Fî 449 para 61 ,5 guruş 10 para Limon şurubu 5 şişe Ayva şurubu 6 şişe Vişne şurubu 1 kıyye 26,5 guruş Elvân şeker 43,5 kıyye Fî 140 para 125 guruş 10 para Bir mikdâr gülbe şeker ve portakal mâyesi 11 guruş Sagīr ve kebîr kavanoz 11 aded 6 guruş Hatab 12 çeki 110 guruş Nişasta 27 kıye Fî 75 para 50 guruş , 25 para Anason 1 kıyye 1 guruş Demir kafes 1 aded 2 guruş Sandalye 3 aded 12 guruş Ceviz mâyesi 1 kavanoz, 5 kıyye Fey 120 para 15 guruş Fakat mağaza-i mezkûr derûnunda zuhûr eden Cem‘an yekûn: Guruş Para Yalnız bin kırk üç buçuk guruş 2 paradır 1043,5 2 Dellâliye 20 - - 1023,5 - Harc-ı hüccet ma‘a kaydiye ve kalemiye 25 - 998,5 2 Sahhu’l-bâkī: 998,5 2 para Yalnız dokuz yüz doksan sekiz buçuk guruş iki paradır. Sahhu’l-bâkī-i merkūm dokuz yüz doksan sekiz buçuk guruş iki para kayyım-ı mersûm Mihal zimmî yedine teslîm olundukda ol dahi bi’l-emâne ahz u kabz. İşbu mahalle şerh verildi. es-Seyyid Abdurrahim el-kādı bi-Dârü’l-hilâfeti’l-aliyye nemekahü’l-fakīr ileyhi azze şânühû. Bu esnâda gāib-i mersûm Aci Kosti zimmî zuhûr <> etmekle sahhu’l-bâkī-i merkūm dokuz yüz doksan sekiz buçuk guruş iki parayı kayyım-ı mesfûr yedinden kabza ve kendiye teslîme tarafından vekâleti Yanaki v. Yorgi ve Andon v. Yuvan zimmîler şehâdetleriyle bi’l-muvâhece ber-nehc-i şer‘î sâbit olan sulbî kebîr oğlu Andon zimmî sahhu’l-bâkī-i merkūm dokuz yüz doksan sekiz buçuk guruş iki parayı huzûr-ı şer‘de kayyım-ı mesfûr yedinden tamâmen ahz u kabz eylediği işbu mahalle şerh verildi. Fi’l-yevmi’s-sâbi‘ min-Zilhicceti’ş-şerîfe li-sene sitte ve erba‘în ve mi’eteyn ve elf. Bâ-mühr-i müşârün-ileyh [Mühür] Abdurrahim. [28b] Devletlü mürüvvetlü semâhatlü Mollacıkzâde Mehmed Servet Efendi hazretlerinin huzûrunda olan vekāyi‘ hüccet sicillidir. Fî-gurreti M sene 1247