İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 175 Hüküm no: 144 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Aleksi’nin dükkân gediğini Bakkal Kiryako’ya sattığı Bakkāl Asıl hüccet târîhi fî 5 Ra sene 1246 İşbu sebt-i hâmiş olunan hüccetde ismi mastûr Bakkāl Aleksi v. Dimitri nâm zimmînin güveyi ve tarafından husûs-ı âti’l-beyânda ikrâr ve takrîre vekîl olduğu Bakkāl Vasil v. Yuvan ve Hıristo v. Kiryako nâm zimmîler şehâdetleriyle sâbit olan İstefan v. Vasil nâm zimmî meclis-i şer‘-i hatîrde kezâlik hüccetde ismi mastûr hâmilü’r-rakīm Bakkāl Kiryako v. Satılmış zimmî muvâcehesinde bi’l-vekâle takrîr-i kelâm edip müvekkilim mersûm ber-mantûk-ı hüccet gedik-i mezkûrdan mâlik olduğum altmış sehm hissemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim izniyle mersûm Kiryako zimmîye dört bin beş yüz guruş semen-i medfû‘ ve makbûza bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba‘d hisse-i mezkûrede benim aslâ ve kat‘â alâka ve medhalim kalmayıp müşteri-i mersûm Kiryako zimmînin mülk-i müşterâsı ve hakk-ı sırfı olmuşdur dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 min-Muharremi’l-harâm sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Ustabaşı Ananosti, Yazıcı Yani.