İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 175 Hüküm no: 145 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Halil Ağa’nın dükkân gediğinin yarı hissesini Çörekçi Mustafa Ağa’ya sattığı Çörekçi mübâya‘ası Mahmiye-i İstanbul’da Üskübî mahallesinde sâkin çörekçi esnâfından el-Hâc Halil Ağa b. el-Hâc Ahmed meclis-i şer‘-i münîrde esnâf-ı mezkûreden işbu bâ‘isü’l-kitâb Mustafa Ağa b. İbrahim mahzarında ikrâr-ı tâm ve takrîr-i kelâm edip mahalle-i mezkûrede vâki‘ turşucu dükkânı ittisâlinde kâin şehriye yirmi guruş kirâ-i kadîmeli bir bâb çörekçi dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme-i mütenevvi‘a yüz yirmi sehm i‘tibârıyla akd-i âti’z-zikrin sudûruna değin yedimde müstakıllen ırsen mülküm olmağla ben ber-minvâl-i muharrer mâlik olduğum gedik-i mezkûrun altmış sehm hissesini yedimde ibkā ve mâ‘adâ altmış sehm hissemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mustafa Ağa’ya beş bin iki yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş bin iki yüz elli guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrun altmış sehm hissesinde benim aslâ ve kat‘â alâka ve medhalim kalmayıp müşteri-i merkūm Mustafa Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 M sene [1]247 Şuhûdü’l-hâl: Kethüdâ Mehmed Sadık Ağa, Balatlı Ali Usta, Fenerli Mehmed Usta, Tahtakaleli Mehmed Usta, Muhzır Hüseyin Çelebi.