İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 176 Hüküm no: 146 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Mehmed Usta’nın dükkân gediği hissesinin yarısını Çörekçi Yanko’ya sattığı Çörekçi mübâya‘ası Âsitâne-i seniyye’de vâki‘ çörekçi esnâfından Mehmed Usta b. Mehmed nâm kimesne meclis-i şer‘-i şerîf-i enverde esnâf-ı mezkûreden işbu hâmilü’r-rakīm Yanko v. Kostandi nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Fener Kapısı dâhilinde hamam karşısında kâin bir bâb çörekçi ve simitçi dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Salih Usta’nın ve mâ‘adâ doksan sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum doksan sehm hisse-i şâyi‘anın kırk beş sehmini yedimde ibkā ve mâ‘adâ kırk beş sehmini tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile şerîkim merkūmun izniyle mersûm Yanko zimmîye iki bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm hisse-i mezkûrda benim aslâ ve kat‘â alâka ve medhalim kalmayıp müşteri-i mersûm Yanko zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 M sene 1247 Şuhûdü’l-hâl: Kethüdâ Mehmed Sadık Ağa, Balatlı Ali Usta, Tahtakaleli Mehmed Usta, el-Hâc Halil Usta.