İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 177 Hüküm no: 147 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kiryako’nun dükkân gediğindeki yetmiş sehm hissesini Bakkal Bratamos’a sattığı Bakkāl Âsitâne-i aliyye’de vâki‘ bakkāl tâifesinden Kiryako v. Satılmış nâm zimmî meclis-i şer‘-i hatîrde tâife-i mersûmeden işbu hâmilü’r-rakīm Kostandi v. İspir zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Topkapı dâhilinde çeşme karşısında kâin Ali Ağa dükkânı denmekle arîf bir bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Bakkāl Bratamos zimmînin ve mâ‘adâ altmış sehmi dahi akd-i âti’z-zikrin sudûruna değin bâ-hüccet-i şer‘iyye yedimizde iştirâken mülkümüz olmağla gedik-i mezkûrdan ber-minvâl-i muharrer mâlik olduğum yetmiş sehm hissemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim mersûmun izn ü icâzetiyle mersûm Kostandi zimmîye yedi bin beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr yedi bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba‘d gedik-i mezkûrun hisse-i şâyi‘asında benim aslâ ve kat‘â alâka ve medhalim kalmayıp müşteri-i mersûm Kostandi zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 5 M sene [1]247 Şuhûdü’l-hâl: Bölükbaşı Abdi Çelebi, Pazarbaşı Süleyman Ağa ve gayruhum. Ustabaşı Kiryako v. İstefan, Ustabaşı Anonosti zimmî, Kabzımâl Sava zimmî, Ustabaşı İsak zimmî.