İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 178 Hüküm no: 148 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Halil Ağa’nın çörekçi dükkân gediğinin verasetle kendisine intikal ettiğini ispat ettiğinden hüccet verilmesi Çörekçi ihbârı Mahrûse-i İstanbul’da Üskübî mahallesinde sâkin çörekçi esnâfından işbu bâ‘isü’l-kitâb el-Hâc Halil Ağa b. el-müteveffâ el-Hâc Ahmed meclis-i şer‘-i enverde takrîr-i kelâm ve bast ani’l-merâm edip mahalle-i mezkûrede vâki‘ şerbetçi dükkânı ittisâlinde kâin beher mâh yirmi guruş kirâ-i kadîmeli bir bâb çörekçi dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme babam müteveffâ-yı mezbûr el-Hâc Ahmed Efendi’nin hayatında yedinde bâ-hüccet mülkü ve ba‘de vefâtihî ancak bana mevrûs olup lâkin yedimde hüccet-i şer‘iyye olmamağla husûs-ı mezkûra vukūf ve ıttılâ‘ları olan esnâf-ı mezkûreden lede’l-istihbâr yedime bir kıt‘a hüccet-i şer‘iyye i‘tâsı murâdımdır dedikde esnâf-ı mezkûreden zeyl-i kitâbda mektûbü’l-esâmî Müslimînden her biri fi’l-hakīka gedik-i mezkûr merkūm el-Hâc Halil Ağa’nın babası müteveffâ el-Hâc Ahmed’in hayatında yedinde mülkü olup ba‘de vefâtihî sulbî kebîr oğlu ancak merkūm el-Hâc Halil Ağa’ya mevrûs olmuşdur deyü bi’l-ittifâk alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb olundu. Fî 2 M sene 1247 Şuhûdü’l-hâl: Kethüdâ Mehmed Sâdır Ağa, Tahtakaleli Mehmed Usta, Fenerli Mehmed Usta, Balatlı Ali Usta, Hafız İsmail Ağa Kethüdâ-i muhzırân.