İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 179 Hüküm no: 151 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil ve Dimitri kardeşlerin dükkân gediklerini Dimitri ve Aleksi’ye sattıkları Kaymakçı Âsitâne-i aliyye’de vâki‘ kaynarcı tâifesinden Vasil ve Dimitri veledey Kosta nâm zimmîler meclis-i şer‘-i hatîrde yine tâife-i mersûmeden işbu hâmileyü’r-rakīm kendi nefsinden asıl ve li-ebeveyn er karındaşı Dimitri v. İsteryo nâm zimmî tarafından husûs-ı âti’z-zikrde tasdîka vekîl-i şer‘îsi Aleksi nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Küçük Mustafapaşa mahallesinde simitçi ve bakkāl dükkânları beynlerinde kâin bir bâb kaynarcı dükkânı derûnunda mevcûde beyne’l-esnâf gedik ta‘bîr olunur bir tencere ve bir terâzî ma‘a derâhim ve bir ayran tası ve sâir âlât-ı lâzıme-i ma‘lûme akd-i âti’z-zikrin sudûruna değin bizim bâ-hüccet-i şer‘iyye yedimizde iştirâken mülkümüz olmağla âlât-ı gedik-i muharrere-i mezkûreyi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asıl ve müvekkil-i mersûmâna iki bin guruşa ale’l-iştirâki’s-seviyy bey‘ ü temlîk ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr iki bin guruşu asıl ve müvekkil-i mersûmân bize tamâmen def‘ ü teslîm ve biz dahi yedlerinden tamâmen ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d âlât-ı gedik-i mezkûrda bizim aslâ ve kat‘â alâka ve medhalimiz kalmayıp müşteriyân-ı asıl ve müvekkil-i mersûmân Dimitri ve Aleksi zimmîlerin mülk-i müşterâları ve hakk-ı sırfları olmuşdur dediklerinde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî 7 [Muharrem] sene 1247 Şuhûdü’l-hâl: Kethüdâ İsmail Ağa, Yiğitbaşı Ebubekir, Ali Usta, Odacı Hüseyin Çelebi. Sofularlı Anaştaş, Alacahamamlı Manol, Kesmekayalı Hıristo, Usta İstefan.