İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 180 Hüküm no: 152 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi ve Vasil’in varislerinin bezirhane gediğindeki hisselerini Beziryağcı Dimitri’ye sattıkları Zeyrek’de Çifte Bezirhâne Mahmiye-i İstanbul’da Zeyrek yokuşu zeylinde kâin Çifte Bezirhâne’de mütemekkin iken bundan akdem hâlik olan Kostandi v. Vasil zimmînin verâseti babası mersûm Vasil zimmî ile Vilâyet-i Anadolu’da Nevşehir kazâsına tâbi‘ Zeila/Zela karyesinde mütemekkinler zevce-i metrûkesi Marya bt. Atam Nasrâniye ile sulbî kebîr oğulları Yani ve Filibo ve sulbiye kebîre kızları Erbonse ve Despino ve İstiratya Nasrâniyelere münhasıra ba‘dehu eb-i mersûm Vasil zimmî dahi hâlik olup verâseti karye-i mezkûrede mütemekkinler sulbiye kebîre kızı Magrine Nasrâniye ile oğlunun oğlu Andon ve kızı Marula v. Yanaki ve hâlik-i evvel mersûmun evlâdları Yani ve Filibo ve Erbonse ve Despino ve İstiratya Nasrâniyelere münhasıra ve mesele-i mîrâsları bi-hükmi’l-münâsahati’ş-şer‘iyye sekiz yüz kırk sehmden olup sihâm-ı mezbûreden yüz beş sehmi zevce-i mersûme Marya Nasrâniyeye ve yüz seksen dörder sehmden üç yüz altmış sekiz sehmi mersûmân Yani ve Filibo zimmîlere ve doksan ikişer sehmden iki yüz yetmiş altı sehmi mersûmât Erbonse ve Despino ve İstiratya Nasrâniyeler isâbeti tahakkukundan sonra verese-i mersûmûndan kendi nefsinden asıl ve li-ebeveyn kız karındaşı mersûme Marula Nasrâniye tarafından husûs-ı âti’l-beyânda vekîl olduğu şahsını bilir Bakkāl Simyon v. Marat ve Yağcı Dimitri v. Vasil nâm zimmîler şehâdetleriyle sâbit olan mersûm Andon zimmî ve bint-i mersûme Makrine Nasrâniyenin zevci ve tarafından husûs-ı âti’z-zikrde vekîl olduğu şahsını ârifân Yağcı Osman Ağa b. Ebubekir nâm kimesne ile Yağcı Endib v. Kostandi nâm zimmî şehâdetleriyle sâbit olan Havyarcı İstavri v. İstefan zimmî ve bint-i mersûme Despino Nasrâniyenin kayın atası tarafından kezâlik husûs-ı câ’i’z-zikrde vekîl olduğu şahsını bilir Yağcı Yorgi v. Praşkova ve Yağcı Dimitri v. Vasil nâm zimmîler şehâdetleriyle sâbit olan Yağcı Andib v. Kostandi nâm zimmî vekâleten ve ibnân-ı mersûmân Yani ve Filibo nâm zimmîler asâleten meclis-i şer‘-i hatîrde bezir yağcı esnâfından işbu hâmilü’r-rakīm Dimitri v. Yorgi nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip mârrü’l-beyân bir bâb çifte bezirhâne derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin yüz yirmi sehm i‘tibârıyla yirmi sehmi Yuvan ve on beş sehmi Petro zimmîlerin ve elli beş sehmi hâlik-i evvel mersûm Kostandi ve otuz sehmi hâlik-i sânî mersûm Vasil zimmîlerin yedlerinde mâlları ve mülkleri olup ba‘de helâkihâ bize ve müvekkilûn-ı mersûmûna ve verese-i sâire-i mezkûresini ber-tashîh-i merkūm mevrûs olmağla hisse-i gedik-i mezkûrdan ber-i‘tibâr-ı mezbûr bizimle müvekkilûn-ı mersûmûnun hisselerimiz olan cem‘an beş yüz elli yedi sehm hisseleri tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerimizin izinleriyle mersûm Dimitri zimmîye iki bin altı yüz yirmi beş guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin altı yüz yirmi beş guruşu bize tamâmen def‘ ü teslîm ve biz dahi yedinden bi’l-asâle ve bi’l-vekâle tamâmen ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrun tashîh-i merkūm üzere hisselerinde bizim aslâ ve kat‘â alâka ve medhallerimiz kalmayıp müşteri-i mersûm Dimitri zimmînin mülk-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 3 Muharrem sene 1247 Şuhûdü’l-hâl: Osman b. Ebubekir, Molla Halil b. Süleyman, Molla Hüseyin b. Yusuf, Molla Emin b. Abdullah, Ali Ağa b. el-Hâc Mehmed. Simyon v. Marat, Dimitri v. Vasil, Endib v. Kostandi, İstemad v. ( ).