Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 417 Hüküm no: 490 Orijinal metin no: [79a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hasan’ın Hüseyin Ağa b. Receb’e sattığı atı kusurlu olması sebebiyle geri alması Mahmiye-i İstanbul’da Saraçhânebaşı’nda sâkin râfi‘ü’l-vesîka Hüseyin Ağa b. Receb meclis-i şer‘-i enverde mahmiye-i mezbûrede Defterdâr Ahmed Çelebi mahallesinde sâkin diğer Hüseyin b. Hasan mahzarında üzerine da‘vâ ve takrîr-i kelâm edip mezbûr diğer Hüseyin târih-i kitâbdan yedi gün mukaddem işbu doru aygır atını cemî‘ uyûbdan sâlim üzre yetmiş beş guruş semen-i makbûza bana bey‘ ve teslîm ben dahi iştirâ ve kabûl ve tesellüm etmişdim hâlâ mârrü’z-zikr atın ön ayaklarının sağ dizi şiş olduğu ayb-ı kadîmine muttali‘ olup ayb-ı mezkûr elân mevcûd ve inde’t-tüccâr noksân semen îcâb eder uyûbdan olmağla diğer Hüseyin’e suâl olunup sâlifü’z-zikr atı yedimden kabz ve semen-i mezbûr-ı medfû‘um olan meblağ-ı mezkûru bana red ve teslîme tenbîh olunmak matlûbumdur dedikde evvelâ teveccüh-i husûmet için mârrü’z-zikr at taraf-ı saltanat-ı aliyyeden ehl-i hibre ta‘yîn olunan Hüseyin Beşe b. Da[vud] ve Receb b. Musa nâm kimesnelere irâet olundukda anlar dahi ba‘de’n-nazar meclis-i şer‘a gelip ayb-ı mezkûr elân mevcûd idiğin haber verdiklerinde gıbbe’s-suâl mezbûr diğer Hüseyin cevâbında kaziyye minvâl-i meşrûh üzre olduğunu ikrâr lâkin ayb-ı mezbûrun kıdemini inkâr edicek müdde‘î-i mezbûrdan ayb-ı mezbûrun kadîmine dahi beyyine taleb olundukda udûl-i müslimînden yine mezbûrân Hüseyin Beşe ve Receb li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ ayb-ı mezbûrun üç aydan evvelde hâdis olup değil ayb-ı kadîmden[dir] biz bu husûsa bu vech üzre şâhidler[iz] şehâdet dahi ederiz deyû her biri edâ-i şehâdet-i şer‘iyye ettikde gıbbe’t-ta‘dîl ve’t-tezkiyye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm sâlifü’z-zikr atı kabz ve semen-i mez[bûr-ı] makbûz olan meblağ-ı mezbûr yetmiş beş guruş müdde‘î-i mezbûra red ve teslîme merkūm diğer Hüseyin’e tenbîh olunup mâ vaka‘a bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Yusuf, Mehmed Çelebi b. İdris, Ahmed Çelebi b. Ahmed.