İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 182 Hüküm no: 153 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyas Ağa ile hanımı Emine Hatun’un uhdelerindeki berber dükkânı gedik hisselerinin bir bölümünü sattıkları Berber mübâya‘ası Mahrûse-i Galata’ya muzâfe kasaba-i Beşiktaş’da Süleymaniye mahallesinde sâkinler Kapan-ı dakīk Kantar Emîni İlyas Ağa b. Osman ve hâlâ zevcesi zâtı mu‘arrefe Emine Hatun bt. Mustafa meclis-i şer‘-i enverde Başmuhâsebe kalemi ketebesinden işbu bâ‘isü’l-kitâb es-Seyyid Mehmed Rifat Efendi b. es-Seyyid Ebubekir ve li-ebeveyn kız karındaşı zâtı mu‘arrefe Şerife Hadice Hanım ve kezâlik zâtı mu‘arrefe Şerife Emine Hatun bt. el-Hâc Hüseyin taraflarından husûs-ı âti’z-zikrde tasdîka vekîl-i şer‘îleri berber esnâfı yazıcısı el-Hâc Abdurrahman Efendi b. es-Seyyid Mehmed Nuri mahzarında her biri ikrâr-ı tâm ve takrîr-i kelâm edip mahmiye-i İstanbul’da Sultanahmed kurbünde Acıhamam nezdinde çekmececi ve haffâf dükkânları beyninde vâki‘ Başmuhâsebe kaleminde Divanyolu’nda Mehmed Ağa sebîli yanında Yahya Usta ismine mukayyed bir bâb muhterik berber dükkânından müstahlas beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin yedimizde bâ-hüccet-i şer‘iyye iştirâken mülkümüz olmağla biz ber-minvâl-i muharrer mâlik olduğumuz gedik-i mezkûrun dört sehm i‘tibârıyla birer sehmden iki sehmini müvekkilûn-ı merkūmûndan mezbûr es-Seyyid Mehmed Rifat Efendi ve kız karındaşı mezbûre Şerife Hadice Hanım’a ve iki sehmini merkūme Şerife Emine Hatun’dan her birine tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide bin guruşa bey‘ ü temlîk ve teslîm eylediğimizde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin guruşu müvekkilûn-ı mezbûrûn bize tamâmen def‘ ü teslîm ve biz dahi yedlerinden tamâmen ve kâmilen ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü [hâvî] ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrda bizim aslâ ve kat‘â alâka ve medhalimiz kalmayıp müşteriyyûn-ı müvekkilûn-ı mezbûrûn es-Seyyid Mehmed Rifat Efendi ve Şerife Hadice Hanım ve Şerife Emine Hatun’un mülk-i müşterâları ve hakk-ı sırfları olmuşdur dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 7 M sene 1247 Şuhûdü’l-hâl: Kethüdâ vekîli el-Hâc İbrahim Ağa, Şeyh Mustafa Efendi, Yiğitbaşı es-Seyyid el-Hâc Mehmed Nuri, Du‘âcı İsmail Efendi, Çavuş vekîli es-Seyyid Mehmed Nuri.