Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 418 Hüküm no: 491 Orijinal metin no: [79a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed b. Abdullah’ın terekesinden eşine mehrinin ödenmesi Mahmiye-i İstanbul’da Lütfi Paşa mahallesi ahâlîsinden olup medîne-i Edirne’de ticâret vechi üzre sâkin iken bundan akdem vefât eden sarrâc Mehmed b. Ahmed b. Abdullah’ın zevce-i menkûhası Fâtıma bt. Ahmed tarafından husûs-ı âti’l-beyâna vekîl olup zât[ını] ma‘rifet-i şer‘iyye ârifân olan el-Hâc Ahmed b. Ramazan ve İbrahim b. Bektaş şehâdetleriyle şer‘an vekâleti sâbite olan Ahmed Çelebi b. Halil meclis-i şer‘-i şerîf-i enverde müteveffâ-yı mezbûrun terekesini kabz ve düyûnunu edâya yedinde mazmûnu mübeyyin hüccet-i şer‘iyye ile vasiyy-i muhtârı olan Ali Çelebi b. Hüseyin mahzarında üzerine da‘vâ ve takrîr-i kelâm edip müvekkilim mezbûre Fâtıma mukaddemâ müteveffâ-yı mezbûr hâl-i hayâtında nefsimi üç bin yedi yüz akçe mehr-i müeccel ile tezvîc ve inkâh, ol dahi tezevvüc ve kabûl edip mehr-i müeccelimi kable’l-edâ vefât etmeğin suâl olunup terekesinden meblağ-ı mezbûru müvekkilim mezbûreye edâ ve teslîm olunmak bi’l-vekâle matlûbumdur dedikde gıbbe’s-suâl vasiyy-i mezbûr tereke-i müteveffâ-yı mezbûra vaz‘-ı yedini ikrâr lâkin mehr-i mezbûrun ol mikdâr idiğini inkâr edicek müdde‘î-i mezbûrdan müdde‘âsına beyyine taleb olundukda zât-ı mezbûreyi ma‘rifet-i şer‘iyye ile ârifân udûl-i müslimînden olup yine mahalle-i mezbûr müezzini olan Ahmed Efendi b. Mustafa ve Yusuf Beşe b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müvekkilem mezbûr Fâtıma nefsini bizim huzûrumuzda tezvîc ve inkâh, ol dahi tezevvüc ve kabûl etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle ve müvekkilem merkūme tahlîf-i şer‘î ile tahlîf olunmağın mûcebiyle ba‘de’l-hükm, mâ vaka‘a bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa b. Ahmed, el-Hâc Mustafa b. Tevekkül, Mehmed b. İdris.