Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 419 Hüküm no: 492 Orijinal metin no: [79b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Esad Efendi’nin vârislerinin Halep’teki dükkânları Seyyid Abdülkerim Çelebi’ye sattığı Husûs-ı câ’i’l-beyânın mahallinde ketb [ve] tahrîri iltimâs olunmağın savb-ı şer‘-i münîrden ba‘s olunan Mevlânâ es-Seyyid Abdülmu‘tî Efendi mahmiye-i İstanbul’da Şeyh Ebülvefâ mahallesinde vâki‘ merhûm es-Seyyid Esad Efendi’nin veresesi menziline varıp zeyl-i kitâbda merkūmü’l-esâmî udûl-i müslimîn huzûrunda akd-i meclis-i şer‘-i âlî eyledikde mahalle-i mezbûrda sâkin iken bundan [akdem] vefât eden merhûm es-Seyyid Esad Efendi b. Abdurrahman Efendi b. Ebülcevâd Efendi’nin verâseti zevceteyn-i metrûketeyni Kerime bt. Abdullah ve Sâliha bt. Abd[ullah] nâm hâtunlara ve sulbî kebîr oğulları umdetü’l-eşrâf es-Seyyid Hüseyin Efendi ve Abdüsselâm Efendi ve sulbiye kebîre kızları Şerife Ayşe Hâtun ve Şerife Ümmühâni Hâtun’a münhasıra oldukdan sonra merkūmân es-Seyyid Hüseyin Efendi ve es-Seyyid Abdüsselâm Efendi ve merkūmât Kerime ve Sâliha ve Ayşe ve Ümmühâni zâtları ma‘rifet-i şer‘iyye ile ârifân es-Seyyid Ebülyüsr Çelebi b. el-Hâc Selahaddin mahzarında her biri ikrâr ve takrîr-i kelâm edip mûrisimiz merhûm-ı merkūmun medîne-i Haleb’de Sakatya sûkunda vâki‘ beynimizde ma‘lûmü’l-hudûd mülkü olup irsen bize intikāl eden biri birine muttasıl iki bâb harâbe paçacı ve çömlekçi dükkânlarımızı bi cümleti’t-tevâbi‘ ve’l-levâhık merkūm es-Seyyid Abdülkerim Çelebi’ye safka-i vâhide otuz guruşa bey‘ ve temlîk ol dahi iştirâ ve temellük ve semen-i merkūm otuz guruşu bize edâ ve teslîm biz dahi yedinden ahz u kabz ve beynimizde iktisâm ettiğimizden sonra mârrü’z-zikr iki bâb harâb dükkânı mahallinde kabz ve tasarrufa merkūm Abdülkerim Çelebi’yi taslît eyledik ba‘de’l-yevm zikr olunan iki bâb dükkân müşterî-i merkūmun mülk-i müşterâsı olmuşdur dedikde gıbbe’t-tasdîki’ş-şer‘î’l-vicâhî vâki‘ [hâli] Mevlânâ-yı mezkûr mahallinde ketb [ve] tahrîr ve ma‘an irsâl Mahmud Bey b. Mehmed ve Ahmed b. Abdullah ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a [ve tis‘în ve elf]. Şuhûdü’l-hâl: İsmail Ağa b. Mehmed, Mehmed Ağa b. İsmail, Ahmed Çelebi Beyzâde, Mehmed Beşe b. Yusuf, Hızır Bey.