Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 419 Hüküm no: 493 Orijinal metin no: [79b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in Hüseyin Çelebi b. Osman’a olan borcunun terekesinden ödenmesi Mahmiye-i İstanbul’da Lütfi Paşa mahallesi ahâlîsinden olup bundan akdem mahrûse-i Edirne’de ticâret üzre sâkin [iken] medyûnen vefât eden Bâzirgân Nasuh demekle ma‘rûf sarrâc Mehmed b. Ahmed b. Abdullah nâm müteveffânın dâyinlerinden mahmiye-i mezbûrede Muhtesib İskender mahallesinde sâkin Hüseyin Çelebi b. Osman meclis-i şer‘-i şerîfde müteveffâ-yı mezbûrun vasiyy-i muhtârı olmağla terekesine vâzı‘ü’l-yed olan Ali Çelebi b. Hüseyin mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz beynimizde ilm-i şer‘ ile ma‘lûm saraç metâ‘ı semeninden elli altı guruş hakkım olup hattâ meblağ-ı mezbûr bana zimmetinde edâsı lâzım deyni olduğunu ikrâr dahi edip kable’l-edâ fevt olmağın vasiyy-i mezbûra suâl olunup terekesinden meblağ-ı mezbûrun alıverilmesi matlûbumdur dedikde gıbbe’s-suâl mezbûr Ali Çelebi tereke-i müteveffâ-yı mezbûra vaz‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsına beyyine taleb olundukda udûl-i müslimînden Solak Ahmed Çelebi b. Halil ve el-Hâc Ali b. el-Hâc Abdi nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr sarrâc Mehmed Çelebi b. Ahmed b. Abdullah bundan akdem hâl-i hayâtında müdde‘î-i mezbûra cihet-i mezkûreden elli altı guruş zimmetinde lâzımü’l-edâ deyni olduğunu bizim huzûrumuzda ikrâr ve i‘tirâf etmişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın ba‘de’t-tahlîfi’ş-şer‘î mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Beşe b. Ahmed, İbrahim Çelebi b. Ahmed, Mehmed b. Halil, Ahmed Efendi b. Mustafa ve gayruhüm.