Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 421 Hüküm no: 495 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed’in Mehmed b. Mustafa’ya olan borcunun terekesinden ödenmesi Mahmiye-i İstanbul’da Muhtesib İskender mahallesinde sâkin saraç tâifesinden bâ‘isü hâze’l-kitâb Mehmed b. Mustafa nâm kimesne meclis-i şer‘-i şerîf-i enverde mahmiye-i mezbûrede Lütfi paşa mahallesi ahâlîsinden olup mahrûse-i Edirne[‘de] ticâret üzre sâkin iken bundan akdem vefât eden Bâzirgân Nasuh demekle ma‘rûf sarrâc Mehmed Çelebi b. Ahmed’in vasiyy-i muhtâr olduğu mütehakkik olmağla terekesine vâzı‘ü’l-yed olan Ali Çelebi b. Hüseyin nâm kimesne mahzarında üzerine da‘vâ ve takrîr-i kelâm edip müteveffâ-yı mezbûrun Mehmed Çelebi zimmetinde hayâtında yedimden müşterâ ve makbûz olan saraç metâ‘ı bahâsından yirmi dört esedî guruş hakkım olup hattâ meblağ-ı mezbûr zimmetinde bana deyni olduğunu şuhûd mahzarında ikrâr edip meblağ-ı mezbûru bana kable’l-edâ fevt olmağla vasiyy-i mezbûr Ali Çelebi’ye suâl olunup meblağ-ı mezbûru müteveffâ-yı mezbûrun terekesinden bana edâ ve teslîme tenbîh olunmak matlûbumdur dedikde gıbbe’s-suâl vasiyy-i mezbûr Ali Çelebi cevâbında fi’l-hakīka müteveffâ-yı mezbûrun terekesine vâzı‘ü’l-yed olan olduğunu ikrâr lâkin [deyn-i merkūmu inkâr edicek] müdde‘î-i mezbûr Mehmed’den müdde‘âsına beyyine taleb olundukda udûl-i müslimînden olup Molla Gürânî mahallesinde sâkin İbrahim b. Ali ve Karagümrük kurbunda Ali Paşa-yı Atîk mahallesinde sâkin Mehmed b. Ahmed nâm kimesneler li ecli’[ş-şehâde] meclis-i şer‘a hâzırân olup istişhâd olunduklarında ber vech-i muharrer üzre müdde‘î-i mezbûrun Mehmed b. Mustafa’ya cihet-i mezbûreden yirmi dört esedî guruş zimmetinde lâzımü’l-edâ deyni olduğunu bizim huzûrumuzda ikrâr ve bizi işhâd-ı şer‘iyye eylediklerinde ba‘de’t-ta‘dîl ve’t-tezkiyye ol dahi hasbe’l-mes’ûl yemîn billâhi’l-aliyyi’l-Azîm [etmeğin] meblağ-ı mezbûru edâya tenbîh olunup mâ vaka‘a bi’t-taleb ketb olundu. Fi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ali, Mehmed Çelebi b. Ahmed, İbrahim Çelebi b. Ahmed, Hüseyin b. Mustafa.