Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 422 Hüküm no: 496 Orijinal metin no: [80b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in Mustafa b. Ahmed’e olan borcunun terekesinden ödenmesi Mahmiye-i İstanbul’da Lütfi Paşa mahallesinde olup bundan akdem mahrûse-i Edirne’de ticâret üzre sâkin iken medyûnen vefât eden Bâzirgân Nasuh denmekle ma‘rûf sarrâc Mehmed b. Ahmed b. Abdullah nâm müteveffâ dâyinlerinden mahmiye-i mezbûrede Altımermer kurbunda Arabacı Bayezid mahallesinde sâkin Mustafa b. Ahmed meclis-i şer‘-i şerîfde müteveffâ-yı mezbûrun vasiyy-i muhtârı olmağla terekesine vâzı‘ü’l-yed olan Ali Çelebi b. Hasan mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz beynimizde ilm-i şer‘î ile ma‘lûm saraç metâ‘ı semeninden on yedi guruş hakkım olup kable’l-edâ fevt olmağın vasiyy-i mezbûra suâl olunup terekesinden meblağ-ı mezbûrun alıverilmesi matlûbumdur dedikde gıbbe’s-suâl mezbûr Ali tereke-i müteveffâ-yı mezbûra vâzı‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsına beyyine taleb olundukda udûl-i müslimînden Mustafa b. Selim ve Musa b. Musli nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr sarrâc Mehmed Çelebi b. Ahmed b. Abdullah bundan akdem hâl-i hayâtında müdde‘î-i mezbûra cihet-i mezkûreden on yedi guruş zimmetinde lâzımü’l-edâ deyni olduğunu bizim huzûrumuzda ikrâr etmişidi biz bu vech üzre şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm mâ vaka‘a bi’t-taleb ketb olundu. Şuhûdü’l-hâl: Mehmed Beşe b. Ahmed, İbrahim Çelebi b. Ahmed, Mehmed b. Halil, Ahmed Efendi b. Mustafa.