Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 423 Hüküm no: 499 Orijinal metin no: [80b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın Mustafa b. Hüseyin’e olan borcunun terekesinden ödenmesi Mahmiye-i İstanbul’da Sultan Selim câmi‘-i şerîfi kurbunda Cebecibaşı mahallesinde sâkin saraç tâifesinden bâ‘isü hâze’l-kitâb Mustafa b. Hüseyin nâm kimesne meclis-i şer‘-i şerîfde mahmiye-i mezbûrede Lütfi Paşa mahallesi ahâlîsinden olup bundan akdem mahrûse-i Edirne’de ticâret üzre iken bundan akdem vefât eden Bâzirgân Nasuh demekle ma‘rûf sarrâc Mehmed b. Abdullah’ın terekesini kabz ve deyni edâya yedinde mazmûnu müsbit hüccet-i şer‘iyye ile vasiyy-i muhtârı olmağla tereke-i müteveffâ-yı mezbûra vâzı‘ü’l-yed olan Ali Çelebi b. Hüseyin nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Mehmed zimmetinde yüz altmış iki guruş hakkım olup hattâ [meblağ-ı mezbûr zimmetinde bana deyni olduğunu şuhûd mahzarında ikrâr edip meblağ-ı mezbûru bana kable’l-edâ fevt olmağla vasiyy-i mezbûr Ali Çelebi’ye suâl olunup] meblağ-ı mezbûr yüz altmış iki guruşun bana alıverilmesi matlûbumdur dedikde gıbbe’s-suâl vasiyy-i mezbûr Ali Çelebi cevâbında tereke-i müteveffâ-yı mezbûra vaz‘-ı yedini ikrâr lâkin deyn-i mezbûru inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup yine saraç tâifesinden Osman b. Ahmed ve Mustafa b. Halil nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Bâzirgân Nasuh demekle ma‘rûf [81a] Mehmed b. Ahmed b. Abdullah bundan akdem hâl-i hayâtında müdde‘î-i mezbûra cihet-i mezkûrdan meblağ-ı mezbûr yüz altmış iki guruş deyni olduğunu bizim huzûrumuzda ikrâr ve bizi işhâd etmişidi biz bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup ve müdde‘î-i mezbûr teklîf-i şer‘î ile tahlîf olundukdan sonra mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed el-Kethüdâ, İbrahim Çelebi b. Mehmed el-Mübâşir, Abdülkerim b. Yunus, Hüseyin b. Mehmed.