İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 265 Hüküm no: 255 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Bogos’un berber dükkânı gediğindeki hissesini Osman’a sattığı Zağferan (Safran) Hanı’nda vekâlet ile berber mübâya‘ası Vilâyet-i Anadolu’da Erzurum sancağında vâki‘ Tercan kazâsına tâbi‘ Pun karyesi mütemekkinlerinden Tütüncü Bogos v. Kazer v. Atam nâm zimmî tarafından ber-vech-i âtî iddi‘â-i vekâlet eden İstanbul’da Zağferan (Safran) Hanı Odabaşısı işbu hâmilü’r-rakīm Kirkor v. Hanparsum nâm zimmî meclis-i şer‘-i hatîrde Divriğili Vartan v. Hrisi nâm zimmî muvâcehesinde mahmiye-i mezbûrede Haccekadın mahallesinde sâkin es-Seyyid Osman Ağa b. es-Seyyid el-Hâc İbrahim ile dülger tâifesinin perâkende kolu neferâtından ve Yolgeçen Hanı’nda bir bâb berber dükkânı gediğinin nısf hissesinin mâlik Aci Karabet v. Kiragos ve hân-ı mezkûr Odabaşısı Sahak v. Agop nâm zimmîler hâzır oldukları hâlde bi’l-vekâle üzerine da‘vâ ve takrîr-i kelâm edip müvekkilim mersûm Bogos v. Kazer v. Atam nâm zimmî mersûm Vartan zimmî zimmetinde cihet-i karzdan alacağı olan on guruşu mersûmdan taleb ve da‘vâya ve mârru’z-zikr Zağferan (Safran) Hanı derûnunda kâin şehriye yedi guruş kirâ-i kadîmeli bir bâb berber dükkânı derûnunda mevcûde Başmuhâsebe kaleminde Manuk zimmî ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûmeden bâ-hüccet-i şer‘iyye şirâen mâlik olduğu nısf hisse-i şâyi‘asını semen-i misliyle âhara bey‘e ve semenini ahz u kabz ve kendiye irsâl ve îsâle tarafından kabûlüme mevkūf bir kıt‘a Ermeniyü’l-imlâ mektûb nâtık olduğu üzere beni vekâlet-i mutlaka-i sahîha-i şer‘iyye ile vekîl ve nâib-i menâb nasb u ta‘yîn edip ve haber-i vekâlet bana vâsıl olduğu hînde ben dahi vekâlet-i mezkûreyi kabûl etmemle mersûm Vartan zimmîye suâl olunup meblağ-ı mezkûru bana edâya tenbîh olunmak bi’l-vekâle murâdımdır deyü ba‘de’d-da‘vâ ve’l-istintâk ol dahi cevâbında cihet-i mezkûreden müvekkil-i mersûm Bogos zimmîye zimmetinde ol mikdâr guruş deyni olduğunu ikrâr ve müdde‘î-i vekîl-i mersûm Kirkor zimmînin ber-minvâl-i muharrer vekâlet müdde‘âsını inkâr ettikde müdde‘î-i vekîl-i mersûmdan ber-minvâl-i muharrer vekâlet müdde‘âsına beyyine taleb olundukda karye-i mezkûre re‘âyâsından Kuyumcuoğlu Kirkor v. Ohannes ve Korgunoğlu Artin v. Krih nâm zimmîler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müvekkil-i mersûm Bogos v. Kazer v. Atam zimmî mersûm Vartan zimmî zimmetinde cihet-i mezkûreden alacağı olan on guruşu mersûmdan taleb ve da‘vâya ve mârrü’l-beyân Zağferan (Safran) Hanı derûnunda kâin bir bâb berber dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeden bâ-hüccet-i şer‘iyye mâlik olduğu nısf hisse-i şâyi‘asını semen-i misliyle âhara bey‘e ve semenini ahz u kabz ve kendiye irsâl ve îsâle tarafından bizim muvâcehemizde işbu müdde‘î-i mersûm Kirkor zimmîyi vekâlet-i mutlaka-i sahîha-i şer‘iyye ile kabûlüne <> mevkūfe vekîl ve nâib-i menâb nasb u ta‘yîn eylediğinde biz dahi haber-i vekâlet-i mezkûreyi mersûm Kirkor zimmîye ifâde eylediğimiz hînde kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûl olmağın mûcebiyle mersûm Kirkor zimmînin vekâletine hüküm ve tenbîh olundukdan sonra vekîl-i mersûm Kirkor zimmî ben meblağ-ı mezkûr on guruşu mersûm Vartan zimmîden bi’l-vekâle ahz u kabz ve zikri sebkat eden gedikden müvekkilim mersûm Bogos zimmînin ber-minvâl-i muharrer mâlik olduğu nısf hisse-i şâyi‘asını hâzırûn-ı merkūmûndan merkūm es-Seyyid Osman Ağa’ya dokuz bin beş yüz guruşa bi’l-vekâle bey‘ ve kabz-ı semen etmemle eğer ba‘de zamânin müvekkilim mersûm Bogos zimmî zuhûr ve beni tevkîlini inkâr birle merkūm es-Seyyid Osman Ağa’dan şer‘an nesne ahzeder ise mikdâr-ı me’hûzuna hâzırân-ı mersûmân Aci Karabet ve Sahak zimmîden her biri kefâlet-i sahîha-i şer‘iyye ile kefîl ve dâmin oldular dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî 13 Ra sene 1247 Şuhûdü’l-hâl: Berberler kethüdâ vekîli el-Hâc İbrahim Ağa, Şeyh Mustafa Efendi, Du‘âcı İsmail Efendi, Yazıcı es-Seyyid el-Hâc Abdurrahman Efendi, Yiğitbaşı es-Seyyid el-Hâc Mehmed Nuri.