İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 266 Hüküm no: 256 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Süleyman Ağa’nın kaybettiği berber gediği hüccetinin yenilenmesi Berber ihbârı Mahmiye-i İstanbul’da Devoğlu mahallesinde sâkin berber esnâfından işbu bâ‘isü’l-kitâb es-Seyyid Süleyman Ağa b. es-Seyyid Ahmed meclis-i şer‘-i şerîf-i enverde ikrâr-ı tâm ve takrîr-i kelâm edip mahmiye-i mezbûrede Tahtakale nezdinde Şerbetçi sûkunda kâin mâhiye beşer guruş kirâ-i kadîmeli bir bâb berber dükkânı derûnunda mevcûde Başmuhâsebe kaleminde Ahmed Usta ismine mukayyed ve mu‘teber şürût-ı nizâma dâhil beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme bâ-hüccet-i şer‘iyye yedimde şirâen mülküm olup lâkin yedimde olan hüccet-i şer‘iyye zâyi‘ olmağla husûs-ı mezkûre berber esnâfından vukūf ve ıttılâ‘ları olan kimesnelerden istihbâr olunup yedime bir kıt‘a hüccet-i şer‘iyye i‘tâsı matlûbumdur dedikde fi’l-hakīka gedik-i mezkûr merkūm es-Seyyid Süleyman Ağa’nın yedinde bâ-hüccet-i şer‘iyye şirâen mülkü olduğunu berber esnâfından zeyl-i vesîkada mektûbü’l-esâmî Müslimîn ihbâr etmeleriyle hıfzan li’l-makāl işbu vesîka-i enîka ketb ü imlâ olundu. Fî 21 Ra sene 1247 Şuhûdü’l-hâl: Eş-şâhidûnü’s-sâbikūn