İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 267 Hüküm no: 258 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatyani ve Kerkeline Nasraniyelerin bakkal dükkânı gediğindeki hisselerini Bakkal Vasil’e sattıkları Bakkāl Vilâyet-i Anadolu’da Nevşehir kazâsına tâbi‘ Zela karyesinde mütemekkineler Samatyani bt. Bedros v. Yakof ve Kerkeline bt. Vasil nâm Nasrâniyelerden mersûme Kerkeline Nasrâniyenin güveyi ve taraflarından husûs-ı âti’l-beyânda vekîlleri olduğu şahıslarını bilir Bakkāl Hıristo v. Angeli ve Bakkāl Anaştaş v. Nikola nâm zimmîler şehâdetleriyle sâbit olan Mihal v. Anaştaş nâm zimmî meclis-i şer‘-i hatîrde bakkāl tâifesinden işbu hâmilü’r-rakīm Vasil v. Sava nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Fener Kapısı dâhilinde Abdi Subaşı mahallesinde kalaycı dükkânı ittisâlinde kâin İmâm dükkânı denmekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Dimitri zimmînin ve otuz sehmi Eftimos zimmînin ve mâ‘adâ otuz sehmin on dokuz buçuk sehmi müvekkilem mersûme Samatyani Nasrâniyenin ve on buçuk sehmi dahi müvekkilem mesfûre Kerkeline Nasrâniyenin akd-i âti’z-zikrin sudûruna değin bâ-hüccet-i şer‘iyye yedlerinde mülkleri olmağla gedik-i mezkûrdan müvekkillerim mersûmetânın ber-vech-i muharrer mâlikeler oldukları hisse-i şâyi‘alarını tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ mersûm Vasil zimmîye bin yedi yüz elli guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin yedi yüz elli guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik fîmâ-ba‘d gedik-i mezkûrun ber-i‘tibâr-ı merkūm hisse-i şâyi‘asında müvekkilelerim mersûmetânın aslâ ve kat‘â alâka ve medhalleri kalmayıp müşteri-i mesfûr Vasil zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 15 S sene [12]47 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako zimmî, Ustabaşı İsak zimmî, Kabzımâl Sava zimmî, Yazıcı Yani zimmî