İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 268 Hüküm no: 259 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Çırçır’daki evini müştemilatıyla birlikte Ahmed Ağa’ya sattığı Çırçır’da mülk menzil mübâya‘ası Mahmiye-i İstanbul’da Çırçır kurbünde el-Hâc Hasan mahallesinde sâkine ve zâtı zeyl-i kitâbda mektûbü’l-esâmî Müslimîn ta‘rîfleriyle mu‘arrefe Şerife Âişe Hatun bt. Ahmed meclis-i şer‘-i münîrde Kapan-ı dakīk yazıcılarından işbu bâ‘isü’l-kitâb el-Hâc Ahmed Ağa b. el-Hâc Said mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezkûrede vâki‘ lede’l-ahâlî ve’l-cîrân ma‘lûmü’l-hudûd tabaka-i ulyâda iki bâb oda ve bir sofa ve bir kenîf ve tabaka-i süflâda iki bâb oda ve bir sofa ve bir kenîf ve eşcâr-ı müsmire ve gayr-ı müsmireli bir mikdâr bahçe ve sokak kapısını müştemil arsası vakf-ı ma‘lûma mukāta‘a-i kadîme-i ma‘lûmeli bir bâb mülk menzilimi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile merkūm el-Hâc Ahmed Ağa’ya dört bin yedi yüz elli guruşa bey‘ ü temlîk ve teslîm ve arsasını dahi bâ-ma‘rifet-i mütevellî meccânen ferâğ ve tefvîz eylediğimde ol dahi ber-minvâl-i muharrer iştirâ ve temellük ve tefevvüz ve tesellüm ve kabz ve kabûl edip semen-i mezkûr dört bin yedi yüz elli guruşu merkūm el-Hâc Ahmed Ağa bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d menzil-i mezkûrda benim aslâ ve kat‘â alâka ve medhalim kalmayıp müşteri-i merkūm el-Hâc Ahmed Ağa’nın mülk-i müşterâsı ve hakk-ı tefevvüzü [müfevvezi] olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 16 S sene 1247 Şuhûdü’l-hâl: Es-seyyid Hafız Mehmed Ağa b. Ahmed, Ali Ağa b. el-Hâc Mehmed, Odacı Hüseyin b. Yusuf, Kayıkçı Hüseyin Ağa b. Hasan ve gayruhum.