İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 269 Hüküm no: 260 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadaret Kaymakamı Ahmed Hulusi Paşa’nın evinin yarısını Sadaret Kethüdası Mehmed Said Pertev Efendi ile kayın validesi Hatice Hatun ve hanımı Ayşe Sıdıka Hatun’a sattığı Karababa sokağında menzil mübâya‘ası Hâlâ kāimmakām-ı âlî-makāmlık zât-ı mekremet-simâtlarıyla pür-zîb-i vâlâ ve ol câh-ı vekâlet-i vekîl-i mutlaklık neyyir-i vücûd-ı sa‘âdet-nümûdlarıyla pür-nûr ve ziyâ olan vezîr-i âsaf-nazar-ı mükerrem sâhib-i simâtü’l-cûd ve’l-himem zâhirü’ş-şefkati alâ-kâffeti’l-ümem devletlü inâyetlü es-Seyyid Ahmed Hulusi Paşa -yesserallâhu te‘âlâ bi’l-hayri mâ-yürîd ve mâ yeşâ’- hazretlerinin kıbel-i devletlerinden husûs-ı meymenet-mahsûs-ı âti’l-beyânda şeref-i hizmet-i vekâletleriyle müşerref olan hazînedâr-ı ve’l-i‘tibâr mahmedetlü el-Hâc Hüseyin Hüsameddin Efendi saray-ı sadrâzamîde vâki‘ hazînedârlara mahsûs odada cânib-i şerî‘at-i garrâdan meb‘ûs vekāyi‘ kâtibimiz Hasan Hasbi Efendi’nin zeyl-i sahîfede keşîde-i bâ-hatt-ı sutûr kılınan Müslimîn huzûrlarında akdeylediği meclis-i şer‘-i şerîf-i lâzımü’t-teşrîfde Devlet-i aliyye-i ebediyyü’l-istikrârda kethüdâ-i sâhib-i nîk-nâm dîl-pezîr-i havâs u âvâm hazret-i sadrâzam ve peder-i efham hasenetü’l-eyyâm mesmû‘ü’l-hâs ve’l-âm temşiyet-i fermân mehâmm-ı enâm sâhibü’r-re’yi’s-sâib ve’t-tedbîr zü’r-refî‘ ve’l-mecdü’l-menîr sa‘âdetlü semâhatlü atûfetlü es-Seyyid Mehmed Said Pertev Efendi necli’l-merhûmü’l-mebrûr İbrahim Efendi hazretleri ile kayın vâlideleri serâ-perde-i iffet ismetlü Hadice Hanım bt. Mehmed Ağa ve halîle-i muhteremeleri perde-pûş-ı ismet iffetlü Âişe Sıdıka Hanım bt. el-Hâc Mehmed Ağa taraf-ı şerîflerinden ber-vech-i âtî tasdîka vekîl-i sâbitü’l-vekâleleri mühürdâr-ı sadâkatkâr hâcegân-ı Dîvân-ı Hümâyûn’dan mekremetlü es-Seyyid Mehmed Nesim Efendi b. Ömer mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î eyleyip Dârü’l-hilâfeti’l-aliyye’de Gedikpaşa kurbünde Divâne Ali mahallesinde Karababa sokağında kâin bir tarafdan ba‘zen tarîk-i hâs ve ba‘zen menâzil ve üç tarafdan tarîk-i âm ile mahdûd hâriciye ve dâhiliyede fevkānî ve tahtânî büyût-ı adîde ve kanavât-ı müsennâtına teba‘iyetle bir masura iki buçuk çuvaldız mâ-i lezîz ve müştemilât-ı sâire-i ma‘lûmeyi muhtevî arsasının bin dokuz yüz yirmi zirâ‘ mahâlli ashâb-ı hayrâtdan merhûm Memi Bey Vakfı’na senede beş bin yedi yüz altmış akçe mukāta‘a ile üzerinde mevcûde ma‘lûmü’l-mikdâr ebniyesi mülk ve mâ‘adâ mahâlli yedi kıt‘a mütevellî temessükleri mantûklarınca ashâb-ı hayrâtdan Kapudan Paşa ve Tersâne Emîni Salih Efendi ve Meşaleci Hasan Bey ve Salih Ağa ve gerek Nasuh ve Kapı Ağası Ahmed Ağa ve Nefise Hatun vakıflarından olarak konak ta‘bîr olunur bir bâb menzil-i kebîr müvekkilim müşârün-ileyh es-Seyyid Ahmed Hulusi Paşa hazretlerinin silk-i mülk-i sahîhleri ve dâhil-i havza-i tasarruf-ı devletleri olmağla ben menzil-i mezkûrun mülk mahallerinden nısf hisse-i şâyi‘asını müvekkil-i mûmâ-ileyh es-Seyyid Mehmed Said Pertev Efendi ve rub‘unu kayın vâlideleri mûmâ-ileyhâ Hadice Hanım ve rub‘unu halîleleri mûmâ-ileyhâ Âişe Sıdıka Hanım hazerâtına tarafeynden îcâb ve kabûlü hâvî şürût-ı müfside ve muvâza‘adan <<ârî>> ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ile semen-i ma‘lûm ve makbûza bi’l-vekâle bey‘ ü temlîk ve vakf olan mahallerini dahi müvekkil-i mûmâ-ileyhim hazerâtına kezâlik iştirâken mütevellîleri re’yleriyle bedel-i ma‘lûm ve makbûz mukābelesinde bi’l-vekâle ferâğ ve tefvîz ü teslîm eylediğimde onlar dahi ber-minvâl-i meşrûh iştirâ ve temellük ve tefevvüz ve tesellüm ve kabz ve kabûl buyurduklarından sonra husûs-ı mezkûra müte‘allika tarafeynden ber-nehc-i şer‘î tebrie-i zimmet buyurulmağın fîmâ-ba‘d menzil-i mezkûr bi-cümletin mâ-yeştemilühû ve yahvîhi müvekkilûn-ı mûmâ-ileyhim es-Seyyid Mehmed Said Pertev Efendi ve Hadice Hanım ve Âişe Sıdıka Hanım hazerâtının ber-minvâl-i muharrer mülk-i müşterâları ve dâhil-i havza-i tasarrufları olmuşdur keyfe mâ yeşâ’ûn ve hasbe mâ-yahtârûn bi’s-sa‘âdeti ve’l-ikbâl temellük ve tasarruf buyursunlar dedikde gıbbe’t-tasdîki’ş-şer‘î vâki‘ hâli mevlânâ-yı mûmâ-ileyh ketb ü tahrîr ve terfîk olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb ü imlâ olundu hemîşe cenâb-ı Rabbi’l-âlemîn her hâlde müteyemmin ve mübârek eyleyip âfât-ı dehrden vikāye ve sıyânet buyura âmîn bi-hürmeti seyyidi’l-enbiyâi ve’l-mürselîn. Fî 3 Ra sene 1247 Şuhûdü’l-hâl: Çukadâr Ali Ağa b. el-Hâc Mehmed, Miftah Ağası Ali Ağa b. Yusuf, Hurşid Ağa b. Yusuf tâbi‘-i kāimmakām paşa.