İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 271 Hüküm no: 261 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin sahibi olduğu soğancı dükkânı gediğinin kendi adına tescil edilerek hüccet verilmesi Soğancı ihbârı İstanbul’da Azebler kurbünde Elvanzâde mahallesinde sâkin iken bundan akdem vefât eden Soğancıbaşı vekîli el-Hâc Hafız Mehmed Efendi b. Ahmed’in sulbî kebîr <> gayrı reşîd oğlu es-Seyyid Ali’nin bâ-hüccet-i şer‘iyye vasiyy-i mansûbu işbu bâ‘isü’l-kitâb İmâmeci Halil Ağa b. Halil nâm kimesne meclis-i şer‘-i münîrde bi’l-vesâye takrîr-i kelâm ve ta‘bîr ani’l-merâm edip mahmiye-i mezbûre hısnı ebvâbından Odunkapısı hâricinde kâin ma‘lûmü’l-hudûd bir bâb soğancı dükkânı derûnunda mevcûde beyne’l-esnâf gedik ta‘bîr olunur iki kantar ve bir sepet ve bir terâzî ma‘a derâhim ve bir akçe tahtası ve sâir âlât-ı lâzıme-i ma‘lûme vasîsi olduğum gayrı reşîd-i merkūmun yedinde müstakıllen mülkü olup lâkin mülkü olduğunu nâtıka yedinde hüccet-i şer‘iyye olmamağın husûs-ı mezkûr erbâb-ı vukūfdan istihbâr olunup kıbel-i şer‘den bir kıt‘a hüccet-i şer‘iyye i‘tâ olunmak bi’l-vesâye murâdımdır dedikde fi’l-hakīka gedik-i mezkûr gayrı reşîd-i merkūmun ilâ-hâze’l-ân yedinde müstakıllen mâlı ve mülkü olduğunu zeyl-i vesîkada muharrerü’l-esâmî <> kimesneler alâ-tarîkı’ş-şehâde ihbâr etmeleriyle hıfzan li’l-makāl işbu vesîka-i enîka bi’t-taleb ketb ü imlâ olundu. Fî-gurreti Rebî‘ülâhir sene 1247 Şuhûdü’l-hâl: Kethüdâ Ömer Ağa, el-Hâc Ahmed Ağa, Mütevellî Mustafa Ağa, Kavaklızâde İsmail Ağa, Kavaklızâde Hafız Mehmed Ağa ve gayruhum.