İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 272 Hüküm no: 263 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma Hatun’un Bakkal Yuvan’daki alacağını tahsil edip yanında rehin olan bakkal gediği hissesini iade ettiği Fekk-i rehn-i bakkāl İşbu sebt-i hâmiş olunan hüccetde ismi mezkûre zâtı mu‘arrefe Esma bt. Hüseyin nâm hatun meclis-i şer‘-i münîrde kezâlik derûn-ı hüccetde ismi <> mastûr Bakkāl Yuvan v. Vasil nâm zimmî muvâcehesinde ikrâr-ı tâm ve takrîr-i kelâm edip ber-mantûk-ı hüccet benim mersûm Yuvan zimmî zimmetinde aslen ve ribhan alacağım olan bin altı yüz seksen guruşu zimmî-i mesfûr tamâmen bana def‘ ü teslîm ve ben dahi yedinden ahz ve tesellüm edip deyn-i mezkûr mukābelesinde ber-mûceb-i hüccet yedimde deyn-i mezkûra takdîmiyle rehin olan otuz sehm hisse-i gediği rehniyetden ba‘de’l-fekk mersûm Yuvan zimmîye teslîm etmemle fîmâ-ba‘d meblağ-ı mezkûrdan mesfûr Yuvan zimmî zimmetinde bir akçe ve bir habbe alacağım ve hisse-i gedik-i merkūmda dahi kat‘â alâka ve medhalim kalmayıp ke’l-evvel mersûm Yuvan zimmînin mülk-i mahzıdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 3 R sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Hafız İsmail Ağa.