İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 273 Hüküm no: 264 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yuvan’ın bakkal gediği hissesini rehin vererek Mehmed Salih ve Ali Rıza’dan borç aldığı Rehn-i bakkāl Âsitâne-i aliyye’de vâki‘ bakkāl tâifesinden Yuvan v. Vasil nâm zimmî meclis-i şer‘-i hatîrde bundan akdem vefât eden Habibe Hanım bt. Abdullah’ın sadrî sagīr oğulları Mehmed Salih ve Ali Rıza Mollaların babaları ve bâ-hüccet-i şer‘iyye vasiyy-i mansûbları işbu bâ‘isü’l-kitâb Muslihiddin Ağa b. Mehmed tarafından husûs-ı âti’l-beyânda tasdîka vekîl-i şer‘îsi es-Seyyid Osman Ağa b. es-Seyyid Eyüb mahzarında ikrâr-ı tâm ve takrîr-i kelâm edip müvekkil-i merkūm Muslihiddin Ağa’nın vasîleri olduğu evlâdları sagīrân-ı mezbûrânın vâlidelerinden müntakil mâllarından istidâne edeceğim bin beş yüz guruş mukābelesinde mahmiye-i mezbûrede Mahmud Paşa-yı Velî Câmi‘-i şerîfi kurbünde Akarçeşme fevkinde vâki‘ Ali Ağa dükkânı denmekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla bâ-hüccet-i şer‘iyye mâlik olduğum otuz sehm hisse-i şâyi‘amı rehin vaz‘ ve müvekkil-i merkūm yedine teslîm eylediğimde ol dahi bi’l-vesâye irtihân ve tesellüm ve kabz ve kabûl eylediğinden sonra hisse-i mezkûreyi li-ecli’l-isti‘mâl bana i‘âre ve teslîm ve ben dahi ber-minvâl-i muharrer isti‘âre ve tesellüm ve kabûl eylediğimden sonra müvekkil-i merkūm Muslihiddin Ağa oğulları sagīrân-ı mezbûrânın mâllarından olmak üzere bana bin beş yüz guruş ikrâz ve teslîm ve ben dahi iktirâz ve kabz ve umûruma sarfla istihlâk etmemle meblağ-ı mezkûr ile semeni işbu târîh-i kitâbdan bir sene tamâmına değin müeccel ve mev‘ûd yine sagīrân-ı mezbûrânın mâllarından olarak vasiyy-i müvekkil-i merkūm yedinden iştirâ ve kabz eylediğim bir aded hilâlî sâ‘at semeninden dahi iki yüz yirmi beş guruş ki cem‘an bin yedi yüz yirmi beş guruş sagīrân-ı merkūmâna zimmetimde sahîhan edâsı vâcib deynimdir dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 4 Rebî‘ülâhir sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum. Ustabaşı Ananosti, Ustabaşı İsak, Ustabaşı Kiryako