İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 274 Hüküm no: 265 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersane-i âmire’de Mutemed Mehmed Şükrü Beyefendi’nin iki cariyesi ve bazı eşyalarını Esma Sultan’a satıp bazı eşyalarını da hibe ettiği Dürre-i iklîl-i devlet gurre-i cebîn-i izz ü rif‘at sâhibe-i sa‘âdet fâhire-i hâize-i devlet-i dünyâ ve âhiret melekiyyetü’z-zât safiyyetü’s-sıfât sâniyetü’r-Râbi‘atü’l-Adeviyye fî-edâi vezâifi’l-ibâdâti’l-fâideti bi-kasabâti’s-sebk fî- mizmâri’l-iffeti ve’l-ihsâni’n-nâileti bi’l-hatti’l-evfâ min-insıbâi’l-birri ve’l-ihsân hazret-i Esma Sultan bt. es-Sultanü’s-sa‘îd ve’l-Hâkānü’l-mecîd es-Sultan Abdülhamid Han --aleyhi’r-rahmetü ve’r-rıdvân cenâb-ı ismet-meâblarına zikri âtî cevârî ve eşyâyı bey‘ ve hibe murâd eden sultan-ı müşârün-ileyhâ hazretlerinin vâlide-i muhteremeleri merhûme ve mağfûrün-lehâ Sîneperver Sultan -aliyyetü’ş-şân hazretlerinin hayatlarında kahvecibaşılık hizmet-i celîleleriyle şeref-yâb olup bundan akdem irtihâl-i dâr-ı bekā eden Abdurrahman Ağa b. Mehmed’in sulbî kebîr oğlu ve Tersâne-i âmire’de Havz-ı kebîr’de mu‘temed-i evvel olan Mehmed Şükrü Beyefendi savb-ı şer‘-i enverden bi’l-iltimâs me’zûnen irsâl olunan başkâtib eşrâf-ı kuzâtdan Mevlânâ İbrahim Ârif Efendi’nin Dârü’l-hilâfeti’l-aliyye Kostantıniyyeti’l-mahmiye’de Küçükmustafapaşa kurbünde Mollahüsrev mahallesinde vâki‘ mîr-i mûmâ-ileyhin menzilinde huzûr-ı Müslimînde akdeylediği meclis-i şer‘-i münîrde sâhibetü hâze’l-kitâbi’l-müstetâb müşârün-ileyhâ Esma Sultan hazretleri taraf-ı bâhirü’s-sa‘âdetlerinden zikri âtî husûsu tasdîka vekîl-i şer‘îleri sa‘âdetlü Bedreddin Ağa b. Abdülmennan mahzarlarında dehen-güşâ-yı takrîr ve zebân-pîrâ-yı ta‘bîr-i mâ-fi’z-zamîr olup bey‘ ve hibe-i âti’z-zikrin sudûruna değin her biri yedimde müstakıllen emvâlim olup işbu akd-i meclis-i şer‘-i âlî olunan menzilin dâhiliyesinde ulyâda kâin üç bâb odalardan nerdüban ittisâlinde vâki‘ odada mevcûd mu‘âyene olunan bir Mushaf-ı şerîf ve bir Delâilü’l-hayrât ile mefrûş olan yün memlû beş minder ve penbe memlû üç minder şiltesi ve üç basma şilte mak‘adı ve İngiliz-kârî bir orta keçesi ve beş pencere perdesi ve göğez ve lâciverd çukadan masnû‘ iki zâr ve bir göğez çukadan masnû‘ donluk ve bir göğez çuka kapı perdesi ve dört basma koltuk yasdığı ve şitâiyye olarak kıtık memlû on bir iplikli paşa çatması yasdık ve tirşe rengi üç çuka mak‘ad ve on bir İngiliz basması yasdık yüzü ve üç İngiliz basması mak‘ad ve sofa ittisâlinde kebîr odada mefrûş yün memlû üç minder ve kıtık memlû on bir göğezli kemhâ yasdık ve üç İngiliz basması mak‘ad ve İngiliz-kârî bir orta keçesi ve iki göğezli kemhâ koltuk yasdığı ve bir mavili ve kırmızılı çuka kapı perdesi ve altı pencere perdesi ve oda-i mezkûr ittisâlinde vâki‘ sagīr odada mefrûş bir minder ve kıtık memlû dört İngiliz basması yasdık ve bir İngiliz basması mak‘ad ve penbe memlû bir minder şiltesi ve bir patiste şilte mak‘adı ve Selanik-kârî bir orta keçesi ve bir İngiliz basması koltuk yasdığı ve bir çuka zâr ve hâriciyede kâin odada mefrûş dört minder ve kıtık memlû sekiz İngiliz basması yasdık ve iki turuncu ihrâm mak‘ad ve bir çuka kapı perdesi ve biri sarılı beyazlı göğezli mavili yeşilli neftîli rızâyî ve biri beyazlı göğezli lâciverdli çubuklu donluk ve biri müsta‘mel sarı çiçekli ve biri parça fermâyiş cem‘an dört şal ve biri penbe çuka ve ikisi yazma ve iki basma ve biri işleme canfes cem‘an altı seccâde ve yün memlû üç çit döşek ve üç döşek çârşebi ve penbe memlû sekiz elvân döşek şiltesi ve üç çit baş yasdığı ve on altı elvân yorgan ma‘a çârşeb ve on sekiz elvân yüz yasdığı ve biri çuka ve biri aba cem‘an iki hâric-i kapı perdeleri ve bir karış-ı tâm çalarlı piştahta sâ‘ati ve bir asma çalar sâ‘at ve bir çift Venedik-kârî sarı takımlı piştov ve beş kehribâlı duhân çubuğu ve ikisi saksonya ve üçü elmas traş cem‘an beş bardak ma‘a tabak ve üç İngiliz-kârî düz bardak ve yedi tencere ve on sahan ma‘a kapak ve bir şorba tası ma‘a tabak ve bir lenger ma‘a kapak ve iki tâbe ve bir kefçe ve bir kefkir ve bir güğüm ve bir kazgan ve sagīr ve kebîr cem‘an beş sini ve üç kadayıf tepsisi ve iki câmeşûy leğeni ve biri sagīr ve biri kebîr cem‘an iki leğen ma‘a ibrik ve biri sagīr ve ikisi üçer gözlü cem‘an üç sefer tası ve üç nühâs mangal ve iki mangal tahtası ve tombak olarak dördü saplı ve üçü kebîr cem‘an yedi şamdan ve iki nühâs şamdan tepsisi ve zarflı olarak Beç-kârî mavili sekiz fincan ve def‘a on iki fincan ma‘a tombak zarf ve iki fincan tepsisi ile rıkka münkāde yedimde mülküm olan orta boylu açık kaşlı kara gözlü Çerkesiyyetü’l-asl Itrıseza ve yine orta boylu açık kaşlı kara gözlü esmerü’l-levn Sakız üserâsından Ziba nâm iki re’s seyyib câriyelerimi üçer kat elbise-i mevcûde-i ma‘lûmeleriyle ma‘an tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i sultan-ı müşârün-ileyhâ hazretlerine yirmi bin guruşa bey‘ ü temlîk ve yine yedimde emvâlim olan biri minakârî tek zarflı İngiliz-kârî dolablı altın köstekli ve biri Brekî? taklîdi Fâris sîm cem‘an iki sâ‘at ve Usta Mehmed tasnî‘i bir sîm devât ve bir çift simlice Fâris piştov ve sarı canfes üzerine tel işleme iki koltuk yasdığı ve sîm saçaklı bir turuncu ihrâmımı dahi hibe-i sahîha-i şer‘iyye ile yine sultan-ı müşârün-ileyhâ hazretlerine mukaddemâ hibe ve temlîk ve müvekkilleri ağa-yı mûmâ-ileyh yediyle teslîm eylediğimde onlar dahi ber-vech-i muharrer iştirâ ve meclis-i hibede mukaddemâ ittihâb ve temellük ve tesellüm ve kabz ve kabûl buyurduklarından sonra semen-i mezkûr yirmi bin guruş mutâlebesine müte‘allika da‘vâdan sultan-ı müşârün-ileyhâ hazretlerinin zimmet-i devletlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledim ba‘de’l-yevm eşyâ ve evânî-i nühâsiye-i muharrere-i mezkûre ve iki re’s cevârî müvekkile-i sultan-ı müşârün-ileyhâ hazretlerinin emvâl-i müşterâtları ve sâlifü’l-beyân sâ‘at ve devât ve piştov ve yasdık ve ihrâm dahi emvâl-i mevhûbeleri ve hakk-ı sırfları olup benim aslâ ve kat‘â alâka ve medhalim kalmadığından mâ‘adâ işbu akd-i meclis-i şer‘-i âlî olunan menzil derûnunda mevcûde [49b] halîlemin eşyâ-i ma‘lûmesinden başka bi’l-cümle melbûsât ve mefrûşât ve evânî-i nühâsiye ve gayrı nühâsiyenin mecmû‘u müvekkile-i sultan-ı müşârün-ileyhâ hazretlerinin mâlları olup benim el-yevm üzerime lâbis olduğum libâsımdan gayrı ismi mâl ıtlâk olunur nesnem yokdur deyü mukırr-ı mûmâ-ileyh Mehmed Şükrü Beyefendi’nin bi’l-cümle takrîr-i meşrûhunu vekîl-i mûmâ-ileyh Bedreddin Ağa bi’l-vekâle tahkīk ve tasdîk etmeğin vâki‘ hâli mevlânâ-yı mezbûr mahâllinde ketb ü tahrîr ve ma‘an meb‘ûs ümenâ-i şer‘den Çukadâr Hüseyin Ağa b. Ali ve Muhzır Molla Halil b. Mustafa ile meclis-i şer‘-i şerîfe gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm li-sene seb‘a ve erba‘în ve mi’eteyn ve elf. Şuhûdü’l-hâl: Mahalle-i mezbûre imâmı Hafız Mehmed İzzet Efendi b. Hafız Hasan, Havz-ı kebîr’de Mu‘temed-i sânî Mehmed Ârif Ağa b. Abdullah, Muhtar-ı evvel Şekerci es-Seyyid Mehmed Salih Ağa b. Abdullah, Berber es-Seyyid el-Hâc Mehmed Ağa b. es-Seyyid İsmail