İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 282 Hüküm no: 271 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleko ve Dimice Nasraniyenin abacı dükkânındaki gedik hisselerini Yorgi’ye sattıkları Zindan Kapısı’nda abacı Mahmiye-i İstanbul hısnı ebvâbından Eğrikapı dâhilinde Kasab İvaz mahallesinde mütemekkine ve şahsı zeyl-i rakīmde muharrerü’l-esâmî kimesneler ta‘rîfleriyle mu‘arrefe Dimice bt. Andon nâm Nasrâniye meclis-i şer‘-i hatîrde abacı esnâfından Aleko v. Dimitri nâm zimmî hâzır olduğu hâlde esnâf-ı mezkûreden işbu bâ‘isü’s-sifr ( ) v. Sürmeli nâm zimmî muvâcehesinde ikrâr-ı tâm ve takrîr-i kelâm edip mahmiye-i mahkiye hısnı ebvâbından Zindan Kapısı hâricinde tarafeyni Sürmeli Yorgi ve Nikola zimmîlerin abacı dükkânları ile mahdûd bir bâb abacı dükkânı derûnunda mevcûde beyne’l-esnâf gedik ta‘bîr olunur bir piştahta ve iki mikrâs ve iki endâze ve bir akçe tahtası ve bir minder âlât-ı lâzıme-i ma‘lûmenin dört sehm i‘tibârıyla iki sehmi benim ve bir sehmi hâzır-ı mersûm Aleko zimmînin ve bir sehmi dahi gāibetü ani’l-meclis Ergiri nâm Nasrâniyenin akd-i âti’z-zikrin sudûruna değin yedimizde ırsen ve şirâen ale’ş-şüyû‘ mülkümüz olmağla âlât-ı gedik-i mezkûrdan ben ber-minvâl-i muharrer mâlike olduğum iki sehm hisse-i şâyi‘a-i mezkûremi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile altı bin yedi yüz on guruşa ve hâzır-ı mersûm Aleko zimmî dahi hisse-i şâyi‘a-i mezkûresini üç bin üç yüz elli beş guruşa mersûm Yorgi zimmîye bi-safkatin vâhidetin her birimiz bey‘ ü temlîk ve vech-i lâyıkları üzere teslîm eylediğimizde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semenleri olan meblağ-ı mezkûrları her birimiz müşteri-i mesfûr yedinden bi’t-tamâm ve’l-kemâl ahz u kabz edip mebî‘-i mezkûrların tağrîr ve gabnine müte‘allika âmme-i de‘âvî ve kâffe-i mutâlebâtdan mersûm Aleko (Yorgi) zimmînin zimmetini ben ve hâzır-ı mersûmdan her birimiz ibrâ-i âmm-ı sahîh-i şer‘î ile ibrâ ve iskāt eylediğimizde ol dahi ibrâ-i mezkûrumuzu kabûl etmekle fîmâ-ba‘d âlât-ı gedik-i mezkûrda olan hisse-i şâyi‘a-i merkūmelerimizde benim ve hâzır-ı mersûm Aleko zimmînin aslâ ve kat‘â alâka ve medhallerimiz kalmayıp müşteri-i mersûm Yorgi zimmînin mülk-i müşterâsı ve hakk-ı sırfı olmuşdur dedikde mukırra-ı mersûme Dimice Nasrâniyenin cemî‘ kelimât-ı meşrûhasını hâzır-ı mersûm Aleko ve müşteri-i mesfûr Yorgi zimmîlerden her biri vicâhen tahkīk ve şifâhen tasdîk etmeğin mâ-vaka‘a [bi’t-taleb tasdîk olundu] Fî 29 Ra sene 1247 Şuhûdü’l-hâl: Kethüdâ es-Seyyid el-Hâc Hüseyin Ağa, Hafız İsmail Ağa b. Mustafa, Ali Ağa b. el-Hâc Mehmed. Abacı Hıristo v. Tanaş, Abacı Yorgi v. Dimitri, Abacı İstavri v. Yafkar, Abacı Eftim v. Hıristo.