İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 283 Hüküm no: 272 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un yumurtacı ve peynirci dükkânındaki gedik hissesini üvey oğlu Ahmed Efendi’ye sattığı Yumurtacı Mahmiye-i İstanbul’da el-Hâc Bayram Kaftânî mahallesinde sâkine ve zâtı ta‘rîf-i şer‘î ile mu‘arrefe olan Fâtıma Hatun bt. Abdullah meclis-i şer‘-i münîrde işbu bâ‘isü’l-kitâb üvey oğlu Ahmed Efendi mahzarında ikrâr-ı tâm ve takrîr-i kelâm edip mahmiye-i mezbûre hısnı ebvâbından Odunkapısı hâricinde vâki‘ bir tarafdan ba‘zen Topal Hasan dükkânı ve ba‘zen el-Hâc Mehmed mağazası ve bir tarafdan mezbûr Topal Hasan mağazası ve bir tarafdan dar sokak ve taraf-ı râbi‘i tarîk-i âm ile mahdûd bir bâb peynirci ve yumurtacı dükkânı derûnunda mevcûde Başmuhâsebe kaleminde mukayyed ve mu‘teber beyne’l-esnâf gedik ta‘bîr olunur bir kantar ve bir terâzî ma‘a derâhim ve bir çekmece ve bir akçe tahtası ve sâir âlât-ı lâzıme-i ma‘lûmenin sekiz sehm i‘tibârıyla yedi sehmi üvey oğlum merkūmun ve bir sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla gedik-i mezkûrdan ben ber-minvâl-i muharrer mâlike olduğum bir sehm hissemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Ahmed Efendi’ye bin beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrun hisse-i mezkûresinde benim aslâ ve kat‘â alâka ve medhalim kalmayıp mecmû‘-ı gedik-i mezkûr müşteri-i merkūm Ahmed Efendi’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 6 R sene 1247 Şuhûdü’l-hâl: Kethüdâ Ömer Ağa, Kavaklızâde Hafız Mehmed Ağa, Mütevellî Mustafa Ağa, Yiğitbaşı Hasan Ağa, Odacı Hüseyin Çelebi.