Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 425 Hüküm no: 501 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in Mehmed b. Hasan’a olan borcunun terekesinden ödenmesi Mahmiye-i İstanbul’da Lütfi Paşa mahallesi ahâlîsinden olup bundan akdem mahrûse-i Edirne’de ticâret üzre sâkin iken medyûnen vefât eden Bâzirgân Nasuh demekle ma‘rûf sarrâc Mehmed b. Ahmed b. Abdullah nâm müteveffânın dâyinlerinden ve mahmiye-i mezbûrede Dülgerzâde mahallesinde sâkin Mehmed b. Hasan meclis-i şer‘-i şerîfde müteveffâ-yı mezbûrun vasiyy-i muhtârı olmağla terekesine vâzı‘ü’l-yed olan Ali Çelebi b. Hüseyin mahzarında üzerine da‘vâ ve takrîr-i kelâm edip müteveffâ-yı mezbûr zimmetinde yedinden müşterâ ve makbûz beynimizde ilm-i şer‘î ile ma‘lûm saraç metâ‘ı semeninden seksen beş esedî guruş hakkım [olup] hattâ meblağ-ı mezbûr bana zimmetinde deyni olduğunu ikrâr dahi edip kable’l-edâ fevt olmağın vasiyy-i mezbûra suâl olunup terekesinden meblağ-ı mezbûrun alıverilmesi matlûbumdur dedikde gıbbe’s-suâl mezbûr Ali Çelebi [cevâbında] tereke-i mezbûra vaz‘-ı yedini ikrâr lâkin deyn-i mezkûru inkâr edicek müdde‘î-i mezbûrdan müdde‘âsına beyyine taleb olundukda udûl-i müslimînden olup mahmiye-i mezbûrede Fenâî Dede mahallesinde sâkin İbrahim Çelebi b. Mehmed Canbâziye mahallesinde sâkin Mehmed b. Mustafa nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ sarrâc Mehmed Çelebi b. Ahmed b. Abdullah bundan akdem hâl-i hayâtında müdde‘î-i mezbûra cihet-i mezbûreden seksen beş esedî guruş deyni olduğunu bizim huzûrumuzda ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûd: Es-Sâbıkūn.