Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 426 Hüküm no: 502 Orijinal metin no: [81a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in Hasan b. Mustafa’ya olan borcunun terekesinden ödenmesi Sarrâc tâifesinden işbu bâ‘isü’l-kitâb Hasan b. Mustafa nâm kimesne meclis-i şer‘-i şerîf-i enverde mahmiye-i İstanbul’da Lütfi Paşa mahallesi ahâlîsinden olup medyûnen Edirne’de ticâret vechi üzre sâkin iken vefât eden Bâzirgân Nasuh demekle ma‘rûf sarrâc Mehmed Çelebi b. Ahmed’in terekesini kabz ve düyûnunu edâya yedinde mazmûnu müsbit hüccet-i şer‘iyye ile vasiyy-i muhtârı olmağla tereke-i müteveffâ-yı mezbûra vâzı‘ü’l-yed olan Ali Çelebi b. Hüseyin mahzarında üzerine da‘vâ ve takrîr-i kelâm edip müteveffâ-yı mezbûr sarrâc Mehmed Çelebi zimmetinde hayâtında yedimden müşterâ ve makbûz beynimizde ma‘lûm saraç metâ‘ı semeninden on beş guruş hakkım olup hattâ meblağ-ı mezbûr bana zimmetinde edâsı lâzım deyni olduğunu ikrâr dahi edip kable’l-edâ fevt olmağın vasiyy-i mezbûra suâl olunup terekesinden meblağ-ı mezbûrun alıverilmesi matlûbumdur dedikde müdde‘î-i mezbûrdan müdde‘âsına beyyine taleb olundukda udûl-i müslimînden Bektaş ve Mahmud b. Ahmed nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr sarrâc Mehmed b. Ahmed hayâtında cihet-i mezkûreden on beş guruş zimmetinde lâzımü’l-edâ deyni olduğunu bizim huzûrumuzda ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû [81b] her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’s-sâmin aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Beşe b. Bektaş, Mahmud b. Ahmed, İbrahim Çelebi b. Ahmed, Hüseyin b. Mehmed, Ahmed b. Mehmed.