İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 285 Hüküm no: 274 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Pavli’nin bakkal gediğinin bir kısmını rehin verip Mehmed Salih Ağa’dan borç aldığı İdâne-i bakkāl Âsitâne-i aliyye’de vâki‘ bakkāl tâifesinden Pavli v. İlya v. Pavli nâm zimmî meclis-i şer‘-i hatîrde mahrûse-i Galata’ya muzâfe kasaba-i Beşiktaş’da Serencebey Yokuşu nâm mahâlde sâkin Enderûn-ı hümâyûn’dan muhrec bâ‘isü’l-kitâb Mehmed Salih Ağa b. Hafız Mehmed mahzarında ikrâr-ı tâm ve takrîr-i kelâm edip merkūm Mehmed Salih Ağa’nın mâlından istidâne eyleyeceğim bin guruş mukābelesinde mahmiye-i mezbûrede Ebulfeth Sultan Mehmed Han-ı Gāzî câmi‘-i şerîfi civârında Malta Çarşısı sûkunda kâin Hasan Ağa dükkânı denmekle ma‘rûf ma‘lûmü’l-hudûd bir bâb <> bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla bâ-hüccet-i şer‘iyye mâlik olduğum otuz sehm hisse-i şâyi‘amı rehin vaz‘ ve merkūm yedine teslîm eylediğimde ol dahi ber-minvâl-i muharrer [51b] irtihân ve tesellüm ve kabz ve kabûl eyledikden sonra hisse-i şâyi‘a-i mezkûreyi li-ecli’l-isti‘mâl bana i‘âre ve teslîm ve ben dahi isti‘âre ve kabz ve kabûl eylediğimden sonra merkūm Mehmed Salih Ağa mâlından bana bin guruş ikrâz ve teslîm ve ben dahi iktirâz ve kabz ve umûruma sarfla istihlâk etmemle meblağ-ı mezkûr ile semeni işbu târîh-i kitâbdan üç sene tamâmına değin müeccel ve mev‘ûd yine merkūm Mehmed Salih Ağa’nın mâlından ve yedinden iştirâ ve kabz eylediğim bir aded hilâlî sâ‘at semeninden dahi dört yüz guruş ki cem‘an bin dört yüz elli guruş merkūm Mehmed Salih Ağa’ya zimmetimde sahîhan edâsı vâcib deynimdir dedikde gıbbe’t-tasdîki’ş-şer‘î mahmiye-i mezbûrede Boyacıkapısı’nda Bakkāl Filibos v. Anaştaş Mesih Ali Paşa-yı Atîk’de Bakkāl Todori v. Apostol ve kasaba-i Beşiktaş’da Bakkāl Bodos v. Lazari ve Karagümrük’de Bakkāl Bratamos v. Todori ve Çarşambapazarı’nda Bakkāl Ananya v. İstavri nâm zimmîlerden her biri meclis-i şer‘-i hatîrde merkūm Mehmed Salih Ağa mahzarında ikrâr ve takrîr-i kelâm edip mukırr-ı mersûm Pavli zimmînin merkūm Mehmed Salih Ağa’ya zimmetinde sahîhan edâsı vâcib deyni olan meblağ-ı mecmû‘-ı mezkûr bin dört yüz elli guruşa biz tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile müte‘âkiben kefîl ve dâminleriz dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 24 Ra sene 1247 Şuhûdü’l-hâl: Enderûn-ı hümâyûn’dan muhrec Ziya Ahmed Ağa b. Abdullah, Çukadâr es-Seyyid Mehmed Emin Ağa b. es-Seyyid Mustafa, Pazarbaşı Süleyman Ağa b. Ömer, Bölükbaşı Abdi Çelebi b. Latif ve gayruhum.