İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 286 Hüküm no: 275 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım’ın horasancı dükkân gediğini Asvader v. Simyon’a sattığı Asıl hüccet Ahiçelebi Mahkemesi’nden Fî 27 N sene 1238 Ayakapısı dâhilinde horasancı İşbu sebt-i hâmiş olunan hüccetde ismi mezkûre zâtı mu‘arrefe Emine Hanım bt. İsmail Ağa meclis-i şer‘-i hatîr-i lâzımü’t-tevkīrde kezâlik derûn-ı hüccetde mastûrü’l-ism Asvader v. Simyon zimmî muvâcehesinde bi-tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin ber-mantûk-ı hüccet-i mezkûre yedimde mülküm olan horasancı gediği âlât-ı mezkûresini tarafeynden bi’l-îcâb ve kabûl âriyen ani’ş-şürûti’l-müfside bâtten ve sahîhan mesfûr Asvader zimmîye bi-safkatin vâhidetin dört bin iki yüz elli guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semeni olan meblağ-ı mezkûr dört bin <> iki yüz elli guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle fîmâ-ba‘d âlât-ı gedik-i mezkûrda benim aslâ ve kat‘â alâka ve medhalim kalmayıp mesfûr Asvader zimmînin mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine <> ve bi’l-cümle husûs-ı mezkûra ve işbu târîh-i vesîkaya gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile <> kabûlü hâvî ibrâ ve iskāt eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 26 R sene 1247 Şuhûdü’l-hâl: Kethüdâ-i muhzırân Hafız İsmail Ağa, Ali Ağa b. el-Hâc Mehmed, Odacı Hüseyin Ağa b. Yusuf ve gayruhum.