İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 286 Hüküm no: 276 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Poliçeci Yorgi’nin bogasici gediğini Taşçı Azus’a satığı Asıl hüccet târîhi fî 9 Receb sene 1245 Bogasici gediği İşbu sebt-i hâmiş olunan hüccetde mastûrü’l-ism Poliçeci Yorgi v. Kostandi nâm zimmî tarafından husûs-ı âti’l-beyânda ikrâr ve takrîre ve i‘tâ-i hüccete vekîl olduğu Tülbentçi Yuvan v. Vasil ve Poliçeci diğer Yuvan v. Yani nâm zimmîler şehâdetleriyle sâbit olan Poliçeci Eftat v. Sava nâm zimmî meclis-i şer‘-i hatîrde işbu bâ‘isü’s-sifr Taşçı Azus v. Kostandi nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim mersûm Yorgi zimmî akd-i âti’z-zikrin sudûruna değin ber-mantûk-ı hüccet mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Azus zimmîye yedi bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr yedi bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Azus zimmînin mülk-i müşterâsı ve hakk-ı sırfı olmuşdur dedi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 20 R sene 1247 Şuhûdü’l-hâl: Kethüdâ es-Seyyid Hafız Mehmed Ağa, Yiğitbaşı es-Seyyid Hafız Ahmed Ağa, Muhzır Odacı Hüseyin Çelebi, Muhzır Molla Mahmud ve gayruhum.