İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 287 Hüküm no: 277 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize Hanım’ın öldükten sonra terekesinin üçte birini vasiyet edip Zübeyde Hanım’ı vasi ve İbrahim Arif Efendi’yi de nazır tayin ettiği Husûs ile vasiyyet Husûs-ı âti’l-beyânın mahâllinde ketb ü tahrîri’çün cânib-i şerî‘at-i garrâdan bi’l-iltimâs me’zûnen irsâl olunan Kâtib es-Seyyid Ahmed Rıza Efendi mahmiye-i İstanbul’da Şeyh Ebulvefâ mahallesinde vâki‘ merhûm Yağlıkçı el-Hâc Ebubekir Efendi’nin halîlesi demekle arîfe Şerife Zübeyde Hanım bt. el-Hâc Ahmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mahmiye-i mezbûrede Edirnekapısı dâhilinde Hadice Sultan mahallesinde sâkine ve zâtı ta‘rîf-i şer‘î ile mu‘arrefe olan Şerife Hafize bt. es-Seyyid Abdülkadir nâm hatun meclis-i ma‘kūd-ı mezkûrda zikri âtî vesâyâsını tenfîze vasiyy-i muhtâre nasb u ta‘yîn eylediği kezâlik zâtı mu‘arrefe işbu bâ‘isetü’l-vesîka mûmâ-ileyhâ Şerife Zübeyde Hanım mahzarında üzerine nâzır nasb u ta‘yîn eylediği eşrâf-ı kuzât-ı kirâmdan İbrahim Ârif Efendi b. el-Hâc Mehmed Sadık Efendi tarafından zikri âtî husûsu tasdîka vekîl-i şer‘îsi mûmâ-ileyhâ Şerife Zübeyde Hanım’ın sadrî kebîr oğlu Dîvân-ı Hümâyûn kalemi ketebesinden Mehmed Bedî Efendi b. el-merkūm el-Hâc Ebubekir Efendi hâzır olduğu hâlde ikrâr-ı tâm ve takrîr-i kelâm edip ben bundan akdem sülüs-i mâlımdan vesâyâ-yı mu‘ayyene ve gayrı mu‘ayyenemi tenfîze Emîrü’l-Buhârî şeyhi olup bin iki yüz kırk iki senesi Muharremi’l-harâmı’nın üçüncü günü vefât eden Mehmed Şeref Efendi b. Hamdullah nâm kimesneyi hayatında işbu târîhden on iki sene mukaddem vasiyy-i muhtâr nasb u ta‘yîn etmişidim lâkin ben vesâyâ-yı mezkûremden rücû‘ birle müteveffâ-yı mezbûru hayatında vesâyetden azl ve ihrâc etmemle bâ-emrillâhi te‘âlâ vefât eylediğimde mârru’z-zikr Hadice Sultan mahallesinde vâki‘ menzilim derûnunda mevcûde mâlım olan altın üzerine masnû‘ bir çift elmas küpe ve altın üzerine masnû‘ tek taşlı bir yüzük ve altın üzerine masnû‘ bir elmas halka ve bir hilâlî koyun sâ‘ati ve bir değirmi fermâyiş şal ve çukaya kaplı bir nîm samur kürk ve altı müsta‘mel basma anteri ve dört basma şalvar ve yün memlû iki çit döşek ve dört yorgan ma‘a çuka çârşeb ve yün memlû dört minder ve Kıbrıs-kârî on yasdık ve Kıbrıs-kârî üç mak‘ad ve dört sahan ma‘a kapak ve iki tencere <> ve bir leğen ma‘a ibrik ve bir câmeşûy tenceresi ve üç kadayıf tepsisi ve bir tâbe ile sâir cemî‘ terekemi ve gāibûn ani’l-meclis Odunkapısı’nda Soğancı Mehmed Yazıcı zimmetinde cihet-i karzdan bâ-temessük beş yüz guruş ve Sultan Mehmed’de Çörekçi Kapısı’nda Tütüncü Mehmed Efendi zimmetinde kezâlik bâ-temessük cihet-i karzdan <> üç yüz guruş ve Mektûbî-i Sadr-ı âlî kalemi hulefâsından hâcegân-ı Dîvân-ı Hümâyûn’dan Mehmed İzzeddin Beyefendi halîlesi iffetlü Emine Hanım zimmetinde kezâlik cihet-i karzdan bâ-temessük beş yüz guruş ve ricâl-i Devlet-i aliyye’den hâlâ tezkire-i sânî sa‘âdetlü Ali Beyefendi halîlesi iffetlü Fâtıma Hanım zimmetinde kezâlik bâ-temessük cihet-i karzdan dört yüz guruş ile sâir zimem-i nâsda olan hukūkumu mûmâ-ileyhâ Şerife Zübeyde Hanım ahz u kabz edip ben zât-ı zevc olmadığım ecilden kadr-ı ma‘rûf olan yüz elli guruş meblağ ile sünnet-i seniyye üzere techîz ve tekfîn ve levâzım-ı defnim görüp benim gāibetü ani’l-meclis Beykozlu Uncubaşı hemşîresi demekle meşhûre Emine Hatun’a cihet-i karzdan zimmetimde deynim olan iki yüz elli guruş ile sâir düyûn-ı müsbetem zuhûr eder ise ba‘de’l-edâ bâkī kalan terekemin sülüsünü ifrâz ve sülüs-i mezkûrdan iki yüz guruş iskāt-ı salât-ı fâitem ve keffâret-i savm ve yemîn ve nüzûrâtım için ba‘de’d-devr fukarâ-i Müslimîne tasadduk eyleye ve benim ba‘de’l-vefât cesedim bi-takdîrillâhi te‘âlâ Şeyh Ebulvefâ Câmi‘-i şerîfi makberesine defn olundukda izn-i medfen olarak câmi‘-i şerîf-i mezkûr vakfının levâzımına sarf için mütevellîsi bulunan kimesneye sülüs-i mezkûrdan yüz guruş i‘tâ eyleye ve yine sülüs-i mezkûrdan elli guruş ifrâz ve ta‘mîr-i kabrime harc ü sarf eyleye ve yine sülüs-i mezkûrdan yüz elli guruş ile bir kıt‘a Mushaf-ı şerîf iştirâ eyleyip müstahıkkīnden bir kimesneye i‘tâ <> eyleye ve sülüs-i mezkûrdan her ne fazla kalır ise fazla-i merkūmeyi vasiyyim mûmâ-ileyhâ kendi nefsi’çün ahz u kabz ve umûruna sarfla istihlâk eyleye ve sülüsân-ı terekemi li-ebeveyn er karındaşım müteveffâ es-Seyyid Mehmed Tahir’in sulbî oğlu Asâkir-i Mansûre-i Muhammediye’den Binbaşı İzzet Ağa taburunda yüzbaşı mülâzımı gāib ani’l-meclis es-Seyyid İsmail’e teslîm eyleye deyü vasiyet ve tenfîzine mûmâ-ileyhâ Şerife Zübeyde Hanım’ı vasiyy-i muhtâr ve üzerine müvekkil-i mûmâ-ileyh İbrahim Ârif Efendi’yi nâzır nasb u ta‘yîn eylediğimde onlar dahi vesâyet ve nezâret-i mezkûreyi kabûl ve merâsimini vaktinde kemâ-yenbagī edâya ta‘ahhüd ve iltizâm eylediler dedikde gıbbe’t-tasâduki’ş-şer‘î vâki‘ hâli kâtib-i mûmâ-ileyh mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu] Fî 10 R sene 1247 Şuhûdü’l-hâl: Merhûm Âtıf Efendi Kütübhânesi hâfız-ı kütübü Ahmed Nuri Efendi b. el-Hâc Mehmed, Şemseddin-i Mollagürani mahallesi müezzini es-Seyyid İsmail Efendi b. es-Seyyid Mustafa, Şeyh Ebulvefâ mahallesi imâmı Hafız Osman Efendi b. Mehmed ve gayruhum.