İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 289 Hüküm no: 278 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın kebabcı gediğini Kebabçı Süleyman Ağa’ya sattığı Kebabçı mübâya‘ası İşbu sebt-i hâmiş olunan hüccetde ismi mezkûr es-Seyyid el-Hâc Hüseyin Ağa b. es-Seyyid Mustafa meclis-i şer‘-i şerîf-i enverde fesçi esnâfından işbu bâ‘isü’l-kitâb Kebabçı Süleyman Ağa b. İbrahim mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin ber-mantûk-ı hüccet mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Süleyman Ağa’ya altı bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr altı bin guruşu tamâmen bana def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü [hâvî] ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Süleyman Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 29 R sene 1247 Şuhûdü’l-hâl: Kethüdâ-i muhzırân Hafız İsmail Ağa, Muhzır Mahmud Çelebi, Odacı Hüseyin Çelebi ve gayruhum.