İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 289 Hüküm no: 279 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Devatçı Esnafı Kethüdası Memiş Ağa’nın görevinden azledilerek yerine Mehmed b. Veliyyüddin’in tayin edildiği Devâtçı esnâfına kethüdâ nasbı Âsitâne-i aliyye’de vâki‘ devâtçı esnâfının kethüdâları olan Memiş Ağa kethüdâlık-ı mezkûrdan bu def‘a azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâsları ve hâlâ muhtesib-i İstanbul hâcegân-ı Dîvân-ı Hümâyûn’dan Mehmed Emin Faik Efendi’nin re’yi munzam idiği tarafından mürsel çukadârı Ali Ağa’nın inhâsıyla zâhir olan esnâf-ı merkūmeden [52b] işbu bâ‘isü’l-kitâb es-Seyyid Mehmed b. Veliyyüddin nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olundu. Fî 27 R sene 1247 Şuhûdü’l-hâl: Yiğitbaşı Emin Ağa, el-Hâc Emin Ağa, Ali Ağa, Halil Ağa.