İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 290 Hüküm no: 280 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Efendi’nin imameci dükkânı gediğindeki hissesini oğlu Süleyman Raif Molla’ya hibe ettiği İmâmeci gediği hibesi Mahalle-i (Mahmiye-i) İslambol’da Mercan Ağa Câmi‘-i şerîfi mahallesi sükkânından es-Seyyid Mehmed Said Efendi b. el-merhûm es-Seyyid el-Hâc Ali Efendi b. Mehmed meclis-i şer‘-i şerîf-i lâzımü’t-teşrîfde bi’t-tav‘i’s-sâf ikrâr-ı tâm ve takrîr-i kelâm edip zikri mürûr eden Mercan Ağa Çarşısı’nda kâin Tombakçı Kirhor zimmî dükkânı ittisâlinde vâki‘ mukaddemâ çıkrıkçı ve hâlâ bir bâb imâmeci dükkânı derûnunda mevcûde beyne’l-esnâf gedik ta‘bîr olunur bir keser ve bir kafes ve bir destgâh ve bir akçe tahtası ve sâir âlât-ı lâzıme-i ma‘lûme benimle li-ebeveyn er karındaşım es-Seyyid Ahmed Raşid Efendi’nin bâ-hüccet-i şer‘iyye yedimizde ırsen ve şirâen ale’l-iştirâki’s-seviyy şâyi‘an mülkümüz olmağla ben âlât-ı gedik-i mezkûrdan hibe-i âti’z-zikrin sudûruna değin ber-minvâl-i meşrûh mâlik olduğum nısf hisse-i şâyi‘a-i mezkûremi sulbî sagīr oğlum es-Seyyid Süleyman Raif Molla’ya hibe-i sahîha-i şer‘iyye ile hibe ve temlîk ve bi’l-velâye kabz etmemle fîmâ-ba‘d âlât-ı gedik-i mezkûrda olan nısf hisse-i şâyi‘amda benim aslâ ve kat‘â alâka ve medhalim kalmayıp oğlum sagīr-i merkūm es-Seyyid Süleyman Raif Molla’nın mülk-i mevhûb ve hakk-ı sarîhi olmuşdur dedikde vâki‘ü’l-hâl hıfzan li’l-makāl işbu vesîka-i enîka bi’l-ibtigā sebt ü imlâ olundu. Fî 25 Rebî‘ülâhir sene 1247 Şuhûdü’l-hâl: Hulefâ es-Seyyid Ahmed Derviş Efendi, Nakkaş es-Seyyid Ali Ağa, Kethüdâ-i muhzırân Hafız İsmail Ağa, Odacı Hüseyin Çelebi.