İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 290 Hüküm no: 281 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Todori’nin iki adet dükkân gediklerini kızlarına sattığı Eğrikapı dâhilinde bakkāl Nüsha-i sâniye ve sâlise ve râbi‘alı Medîne-i Üsküdar’a muzâfe Büyükbakkāl karyesinde mütemekkin bakkāl tâifesinden Todori v. Ustoliko v. Yorgi nâm zimmî tarafından husûs-ı âti’l-beyânda vekîl olduğu Bakkāl Kostandi v. Yani ve Bakkāl Dimitri v. diğer Yani nâm zimmîler şehâdetleriyle sâbit olan Bakkāl Nikola v. Yorgi nâm zimmî meclis-i şer‘-i hatîrde müvekkil-i mersûmun sulbiye kebîre kızları işbu bâ‘isâtü’s-sifr şahısları mu‘arrefe Sofya nâm Nasrâniye asâleten ve kendi nefsinden asıl ve kız karındaşları Eleniko ve Vaniklice Nasrâniyeler taraflarından husûs-ı âti’z-zikrde tasdîka vekîl-i şer‘îleri Katrine nâm Nasrâniye muvâcehelerinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Eğrikapı dâhilinde kâin Bağdadlı dükkânı denmekle ma‘rûf bir bâb ve yine bâb-ı mezkûr kurbünde kolluk karşısında kâin Hancı Osman dükkânı denmekle ma‘rûf bir bâb ki cem‘an iki bâb bakkāl dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmeler yüz yirmişer sehmden cem‘an iki yüz kırk sehm i‘tibârıyla akd-i âti’z-zikrin sudûruna değin bâ-hüccet-i şer‘iyye müvekkilim mersûmun yedinde mâliki ve mülkü olmağla müvekkilim mersûmun ber-minvâl-i muharrer mâlik olduğu gedik-i mezkûrları tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile kızları asılât ve müvekkilât-ı mersûmâta ale’l-iştirâki’s-seviyy beş bin guruşa bi’l-vekâle bey‘ ü temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr beş bin guruşu bana tamâmen def‘ ü teslîm ve ben dahi yedlerinden bi’l-vekâle ahz u kabz etmemle mebî‘-i mezkûrların tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrlarda müvekkilim mersûmun aslâ ve kat‘â alâka ve medhali kalmayıp müşteriyât-ı asılât ve müvekkilât-ı mesfûrât Sofya ve Aleniko ve Vaniklice ve Katrine Nasrâniyelerin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 6 Ca sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi Ustabaşı Kiryako, Ustabaşı İsak, Ustabaşı Ananosti, Ustabaşı Yakomi, Kabzımâl Sava, Yazıcı Yani.