İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 291 Hüküm no: 282 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İslavi zimminin çörekçi dükkânı gediğindeki hissesini Markar’a sattığı Asıl hüccet târîhi fî 10 M sene 1247 Çörekçi İşbu sebt-i hâmiş olunan hüccetde mezkûrü’l-ism İslavi v. Nikola nâm zimmî meclis-i şer‘-i hatîrde uncu tâifesinden işbu bâ‘isü’s-sifr Markar v. Ohan nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin ber-mantûk-ı hüccet mâlik olduğum nısf gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşterekim izniyle mersûm Markar zimmîye bin iki yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin iki yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm nısf gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Markar zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 3 Ca sene 1247 Şuhûdü’l-hâl: Büyükkaramanlı es-Seyyid İbrahim Usta, Sultan Mehmedli es-Seyyid Ahmed Usta, Langalı Ahmed Usta, es-Seyyid el-Hâc Mustafa Usta.