Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 426 Hüküm no: 503 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selim Beşe b. Hasan’ın Seyyid Mustafa b. Seyyid Mehmed’e olan borcunu ödemesi Mahmiye-i İstanbul’da Sultan Mehmed Hân kurbunda Küçük Karaman sûkunda kasab olan işbu bâ‘isü’l-kitâb es-Seyyid Mustafa [b.] es-Seyyid Mehmed nâm kimesne meclis-i şer‘-i şerîf-i enverde yine tâife-i mezbûrdan Selim Beşe b. Hasan mahzarında üzerine da‘vâ ve takrîr-i kelâm edip mezbûr Selim Beşe zimmetinde yedimden iştirâ ve kabz eylediği vakıyye ve semeni beynimizde ilm-i şer‘î ile ma‘lûm lahm-ı ganem bahâsından ba‘de küllî hesâb sekiz bin yedi yüz akçe hakkım olup meblağ-ı mezbûrun bin yedi yüz akçesini bundan akdem bana def‘ ve teslîm ben dahi yedinden ahz u kabz edip yedi bin akçe hakkım zimmetinde bâkī kalmışdı taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Selim Beşe cevâbında fi’l-hakīka müdde‘î-i mezbûr es-Seyyid Mustafa Çelebi’ye ber vech-i muharrer cihet-i mezbûrdan bâkī yedi bin akçe elân zimmetimde vâcibü’l-edâ ve lâzımü’l-kazâ deynimdir deyû tâyi‘an i‘tirâf etmeğin alâ mûcebi i‘tirâfihî meblağ-ı mezbûr yedi bin akçeyi edâya müdde‘î-i mezbûr es-Seyyid Mustafa’ya tenbîh olunup mâ hüve’l-vâki‘ bi’t-taleb ketb olundu. Fi’l-yev[m]i’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ali Efendi el-Kâtib, Hüseyin Efendi Üsküdarî, Mehmed Beşe Ser-bölük, Mehmed Çelebi b. Veli?.