İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 292 Hüküm no: 283 Orijinal metin no: [52b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav Kostandi’nin manav dükkânı gediğindeki hissesini oğlu Ligor’a sattığı Manav mübâya‘ası Âsitâne-i aliyye’de vâki‘ manav tâifesinden Kostandi v. Bafos nâm zimmî meclis-i şer‘-i hatîrde tâife-i mersûmeden sulbî kebîr oğlu işbu hâmilü’r-rakīm Ligor nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Balıkpazarı Kapısı hâricinde Eminönü nâm mahâlde Gümrük cânibinde ateş kayıkları karşısında köşebaşında Said Ağa dükkânı ittisâlinde kâin bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk beş sehmi işbu hâzır bi’l-meclis Boresti(?) v. Nikola zimmînin ve on beş sehmi gāib ani’l-meclis Ahmed’in ve otuz sehmi kezâlik gāibetü ani’l-meclis Aydınlı Mehmed Ağa’nın kerîmesi Âişe Hanım’ın ve mâ‘adâ otuz sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum otuz sehm hisse-i şâyi‘amı tarafeynden [53a] îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerim hâzır ve gāibân-ı mezbûrûnun izinleriyle oğlum mersûma iki bin yedi yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin yedi yüz elli guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm hisse-i mezkûrda benim aslâ ve kat‘â alâka ve medhalim kalmayıp oğlum müşteri-i mersûm Ligor zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî 10 Ca sene 1247 Şuhûdü’l-hâl: Bölükbaşı İbrahim Edhem Çelebi, Muhzırlar Kethüdâsı İsmail Ağa. Ustabaşı Yuvan v. Gavrail(?), Süpürgeci Yorgi v. Sünbül, Necamyus v. Mosi, Kostandi v. İsak