İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 293 Hüküm no: 284 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Yazıcı’nın değirmen gediğini Mehmed Ağa’ya sattığı Kasımpaşa’da uncu değirmeni Mahrûse-i Galata’ya muzâfe kasaba-i Kasımpaşa’da Defterdâr-ı esbak Yaş Hasan Efendi mahallesinde sâkin es-Seyyid Ahmed Yazıcı b. es-Seyyid Ahmed meclis-i şer‘-i şerîf-i enverde kasaba-i mezkûrede el-Hâc Hüsrev mahallesinde sâkin hâlâ devletlü serasker paşa hazretlerinin tevâbi‘âtından işbu bâ‘isü’l-kitâb Mehmed Ağa b. Ahmed mahzarında ikrâr-ı tâm ve takrîr-i kelâm edip mârru’z-zikr kasaba-i Kasımpaşa’da Matbahardı nâm mahâlde kâin iki horos sekiz re’s bârgirli bir bâb uncu değirmeni derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iyye yedimde müstakıllen mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Ağa’ya beş bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Mehmed Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 6 Ca sene 1247 Şuhûdü’l-hâl: Kethüdâ es-Seyyid Mehmed İzzet Efendi, Halıcı İsmail Ağa, es-Seyyid İsmail Ağa b. el-Hâc Halil, es-Seyyid Mustafa Ağa, el-Hâc Halil Ağa b. Mehmed.