İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 294 Hüküm no: 285 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın değirmen gediğini Uncu Ahmed Yazıcı’ya kiraya verdiği Değirmen îcârı Mahrûse-i Galata’ya muzâfe Kasaba-i Kasımpaşa’da el-Hâc Hüsrev mahallesinde sâkin hâlâ devletlü serasker paşa hazretlerinin tevâbi‘âtından Mehmed Ağa b. Ahmed meclis-i şer‘-i şerîf-i enverde kasaba-i mezkûrede Defterdâr-ı esbak Yaş Hasan Efendi mahallesinde sâkin işbu bâ‘isü’l-vesîka Uncu es-Seyyid Ahmed Yazıcı b. Ahmed mahzarında ikrâr-ı tâm ve takrîr-i kelâm edip ashâb-ı hayrâtdan merhûm Kasım Paşa Vakfı’ndan bi’l-icâreteyn mutasarrıf olduğum kasaba-i mezkûrede Matbahardı nâm mahâlde kâin iki horos sekiz re’s bârgirli bir bâb uncu değirmeni ve değirmen-i mezkûr derûnunda mevcûde beyne’l-esnâf gedik ta‘bîr olunur âlât-ı lâzıme-i mütenevvi‘a-i ma‘lûme bâ-hüccet-i şer‘iyye yedimde müstakıllen mâlım ve mülküm olmağla ben ber-minvâl-i muharrer mutasarrıf ve mâlik <> olduğum değirmen-i mezkûru cemî‘ edevâtıyla işbu târîh-i kitâbdan aded-i şühûr beyân olunmaksızın ben beher mâh doksan yedişer buçuk guruş kirâ mukāvelesiyle merkūm es-Seyyid Ahmed Yazıcı’ya îcâr ve teslîm eylediğimde ol dahi ber-vech-i muharrer istîcâr ve tesellüm ve kabz ve kabûl eylediğinden sonra kirâ-i mezkûr beher şehr doksan yedişer buçuk guruşu merkūm es-Seyyid Ahmed Yazıcı mâh be-mâh bana bilâ-ezâ ve lâ-cefâ edâya ta‘ahhüd eyledi deyü mukırr-ı merkūm Mehmed Ağa’nın bi’l-cümle takrîr-i meşrûhunu merkūm es-Seyyid Ahmed Yazıcı vicâhen tasdîk ve şifâhen tahkīk etmeğin mâ-vaka‘a [bi’t-taleb ketb olundu] Fî 6 Ca sene 1247 Şuhûdü’l-hâl: Eş-şâhidûnü’s-sâbikūn