İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 294 Hüküm no: 286 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Nikola’nın bostan gediğini Bahçıvan Petro’ya sattığı Bostan mübâya‘ası Âsitâne-i aliyye’de vâki‘ bahçıvan tâifesinden Nikola v. el-hâlik Kiryazi v. Eftim nâm zimmî meclis-i şer‘-i hatîrde tâife-i mersûmeden işbu bâ‘isü’s-sifr Petro v. Yani nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Koska kurbünde merhûm Ragıb Paşa Kütübhânesi zahrında vâki‘ Kütübhâne bostanı denmekle ma‘rûf bir kıt‘a bostan derûnunda mevcûde beyne’l-hıref gedik ta‘bîr olunur iki bel ve iki tarak(?) ve bir çapa ve bir kantar ve bir [terâ]zi ma‘a derâhim ve bir kantar ve on sepet ve sâir âlât-ı lâzıme-i ma‘lûme ve eşcâr-ı magrûse-i mütenevvi‘a akd-i âti’z-zikrin sudûruna değin babam hâlik-i mersûmdan ırsen yedimde mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Petro zimmîye iki bin dokuz yüz altmış guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin dokuz yüz altmış guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Petro zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Ca sene 1247 Şuhûdü’l-hâl: Kethüdâ es-Seyyid Süleyman Ağa, Kethüdâ-i muhzırân İsmail Ağa ve gayruhum Yiğitbaşı Pandeli v. Yani zimmî, Ziso v. Hıristo zimmî, Kostandi v. Vasil zimmî, Krihyo v. Todori zimmî, Hıristo v. Kiryako zimmî.