İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 295 Hüküm no: 287 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Mehmed Usta’nın dükkân gediğindeki hissesini Çörekçiler Kethüdası Mehmed Sadık Ağa’ya sattığı Çörekçi mübâya‘ası Mahmiye-i İstanbul’da Davudpaşa İskelesi kurbünde Kasab İlyas mahallesinde sâkin çörekçi esnâfından Mehmed Usta b. Mustafa nâm kimesne meclis-i şer‘-i şerîf-i enverde esnâf-ı mezkûrenin hâlâ kethüdâları işbu bâ‘isü’l-kitâb Mehmed Sadık Ağa b. Ahmed mahzarında ikrâr-ı tâm ve takrîr-i kelâm edip mahmiye-i mahkiyede Sultan Ahmed Câmi‘-i şerîfi kurbünde İmâret Kapısı ve kahve dükkânı beynlerinde kâin bir bâb çörekçi ve simitçi fırını derûnunda mevcûde beyne’l-esnâf gedik ta‘bîr olunur âlât-ı lâzımenin yüz yirmi sehm i‘tibârıyla altmış sehmi Ahmed Usta’nın ve mâ‘adâ altmış sehmi dahi akd-i âti’z-zikrin sudûruna değin benim bâ-hüccet-i şer‘iyye yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlik olduğum altmış sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim izniyle merkūm Mehmed Sadık Ağa’ya bin dokuz yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin dokuz yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrun ber-i‘tibâr-ı merkūm altmış sehm hissesinde benim aslâ ve kat‘â alâka ve medhalim kalmayıp müşteri-i merkūm Mehmed Sadık Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 9 Ca sene 1247 Şuhûdü’l-hâl: Odacı Hüseyin Çelebi b. Yusuf, Yiğitbaşı İbrahim Edhem b. İbrahim, Alacahamamlı Hüseyin b. Hüseyin, Bahçekapılı İbrahim Usta b. Ahmed, Samatyalı Ali Usta b. Ömer.