İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 296 Hüküm no: 288 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Pavli’nin bakkal gediği hissesini rehin verip Hatice Hatun’dan borç aldığı İdâne-i rehn-i bakkāl Âsitâne-i seniyye’de vâki‘ bakkāl tâifesinden Pavli v. İlya v. Pavli nâm zimmî meclis-i şer‘-i hatîrde mahrûse-i Galata’ya muzâfe kasaba-i Beşiktaş’da Serencebey Yokuşu nâm mahâlde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe işbu bâ‘isetü’l-kitâb Hadice Hanım bt. Abdullah’ın zevci ve tarafından husûs-ı âti’l-beyânda tasdîka vekîl-i şer‘îsi Enderûn-ı hümâyûn’dan muhrec Mehmed Salih Ağa b. Hafız Mehmed mahzarında ikrâr-ı tâm ve takrîr-i kelâm edip müvekkile-i mezbûre Hadice Hanım’ın mâlından istidâne edeceğim bin iki yüz guruş mukābelesinde bâ-hüccet-i şer‘iyye mâlik olduğum mahmiye-i mezbûrede Cumartesipazarı kurbünde Mesih Ali Paşa-yı Atîk mahallesinde kâin Receb Ağa dükkânı denmekle ma‘rûf ma‘lûmü’l-hudûd bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehm hisse-i şâyi‘amı rehin vaz‘ ve müvekkile-i mezbûre yedine teslîm eylediğimde ol dahi ber-vech-i muharrer irtihân ve tesellüm ve kabûl eylediğinden sonra hisse-i şâyi‘a-i mezkûreyi li-ecli’l-isti‘mâl bana i‘âre ve teslîm ve ben dahi isti‘âre ve kabz ve kabûl eylediğimden sonra müvekkile-i mezbûre Hadice Hanım mâlından bana bin iki yüz guruş ikrâz ve teslîm ve ben dahi iktirâz ve kabz ve <> ve umûruma sarfla istihlâk etmemle meblağ-ı mezkûr ile semeni işbu târîhden üç sene tamâmına değin müeccel ve mev‘ûd yine müvekkile-i merkūmenin mâlından ve yedinden iştirâ ve kabz eylediğim bir aded hilâlî sâ‘at semeninden dahi beş yüz kırk guruş ki cem‘an bin yedi yüz kırk guruş müvekkile-i merkūme Hadice Hanım’a zimmetimde sahîhan edâsı vâcib deynimdir dedikde gıbbe’t-tasdîk mahmiye-i mezbûrede Sultan Mehmed Câmi‘-i şerîfi Boyacıkapısı’nda Bakkāl Filibos v. Anaştaş ve Mesih Ali Paşa-yı Atîk’de Bakkāl Todori v. Apostol ve kasaba-i Beşiktaş’da Bakkāl Bodos v. Lazari ve Karagümrük’de Bakkāl Bratamos v. Todori ve Çarşambapazarı’nda Bakkāl Ananya v. İstavri nâm zimmîlerden her biri meclis-i şer‘-i hatîrde vekîl-i merkūm Mehmed Salih Ağa mahzarında ikrâr-ı tâm ve takrîr-i kelâm edip mukırr-ı mersûm Pavli zimmînin müvekkile-i merkūme Hadice Hanım’a zimmetinde sahîhan deyni olan meblağ-ı mecmû‘-ı mezkûr bin yedi yüz kırk guruşa biz tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile müte‘âkiben kefîl ve dâminleriz dediklerinde gıbbe’t-tasâduki’[ş-şer‘î mâ-vaka‘a bi’t-taleb ketb olundu] Fî 24 Ra sene 1247 Şuhûdü’l-hâl: Enderûn-ı hümâyûn’dan muhrec Ziya Ahmed Ağa b. Abdullah, Çukadâr es-Seyyid Mehmed Emin Ağa b. es-Seyyid Mustafa, , Pazarbaşı Süleyman Ağa b. Ömer, Bölükbaşı Abdi Ağa b. Abdüllatif.