İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 297 Hüküm no: 289 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarachane esnafı kethüdalığına Saraç Halil Ağa’nın tayin edildiği Kethüdâ nasbı Âsitâne-i aliyye’de vâki‘ Saraçhâne esnâfı kethüdâsı Mehmed Ağa b. Nasuh kethüdâlık-ı mezkûrdan bu def‘a bi’t-terâzî keff-i yed eylediğine binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî Müslimînin ihbâr ve iltimâsları ve hâlâ muhtesib-i İstanbul hâcegân-ı Dîvân-ı Hümâyûn’dan Mehmed Emin Faik Efendi’nin re’yi munzam idiği tarafından mürsel çukadârı Ali Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb Halil Ağa b. İbrahim nâm kimesneyi hâkim-i hâsim vâlâ cenâb veffakallâhu te‘âlâ bi’s-sıdk ve’s-savâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ [bi’l-ibtigā sebt ü imlâ olundu] Fî 11 Ca sene 1247 Şuhûdü’l-hâl: El-hâc Ali Efendi b. Ali, Hasan Ağa b. Hüseyin, Abdi Ağa b. el-Hâc Ali, Mehmed Sadık Ağa b. Hasan, el-Hâc Ömer Ağa b. el-Hâc Yusuf, es-Seyyid el-Hâc Ebubekir Ağa b. Veliyyüddin, es-Seyyid el-Hâc Mehmed Ağa b. Ali, Mehmed Sâdır Ağa b. Abdullah.