İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 325 Hüküm no: 301 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sepetçi Mustafa’nın sepetçi dükkân gediğini Sepetçi Ali’ye sattığı Sepetçi gediği Âsitâne-i aliyye’de vâki‘ sepetçi esnâfından Mustafa b. İbrahim nâm kimesne meclis-i şer‘-i münîrde esnâf-ı mezkûreden işbu bâ‘isü’l-kitâb Ali b. Ali nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede Saraçhânebaşı’nda vâki‘ Küçük Saraçhâne denmekle arîf saraçhâneye kapıdan içeri girer iken sağ cânibde Sepetçi İbrahim ve Sofuoğlu İsmail dükkânları beyninde kâin bir bâb sepetçi dükkânı derûnunda mevcûde beyne’l-esnâf gedik ta‘bîr bir destgâh ve üç demir ve sâir âlât-ı lâzıme-i ma‘lûme akd-i âti’z-zikrin sudûruna değin benim bâ-hüccet-i şer‘iyye yedimde mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Ali’ye yedi yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr yedi yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fîmâ-ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Ali’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 18 Ca sene 1247 Şuhûdü’l-hâl: Kethüdâ Mehmed b. Mehmed, es-Seyyid Hasan b. Musa, Mustafa b. Halil, Ali b. Ahmed, Yiğitbaşı Veys.