İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 325 Hüküm no: 302 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mikail ve İrem zimmilerin devlete olan borçlarının ödenmesi için değirmen ve İfraziye fırınındaki gedik hisselerinin Kasper zimmiye satıldığı Değirmen ve İfrâziye fırını Âsitâne-i aliyye ve Bilâd-ı Selâse’de vâki‘ ekmekçiler esnâfının kethüdâları olup ber-vech-i âtî kayyım nasb olunan Osman Ağa b. Abdülhamid meclis-i şer‘-i şerîf-i enverde ekmekçi tâifesinden işbu hâmilü’r-rakīm Kasper v. Bogos nâm zimmî muvâcehesinde ikrâr ve takrîr-i kelâm edip mahmiye-i İstanbul’da Atpazarı kurbünde Harâccı Muhyiddin mahallesinde kâin İfrâziye fırını denmekle şehîr ma‘lûmü’l-hudûd bir bâb fırın-ı habbâz ve ona merbût Kapan-ı dakīk kapısı kurbünde Hızırbey mahallesinde kâin kezâlik ma‘lûmü’l-hudûd dört horos on altı re’s bârgirli bir bâb değirmen derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin on altı sehm i‘tibârıyla üçer sehmden altı sehmi Turak zimmî ve Serpohi Nasrâniye veledey Arakil’in ve üç sehmi Mikail v. Kigork zimmînin ve dört sehmi İrem v. Arakil zimmînin ve üç sehmi dahi mersûm Kasper zimmînin yedlerinde iştirâken ve şâyi‘an mülkleri olup lâkin mesfûrûndan mersûmân Mikail ve İrem zimmîlerin cânib-i mîrîye zehâir esmânından sekiz bin beş yüz yetmiş dört guruş deynleri olup ve deyn-i mezkûru âhar cihetle edâya iktidârları olmamağla bu makūle cânib-i mîrîye deynleri olan kimesnelerin mâlik oldukları gedikleri bi’l-müzâyede âhara bey‘ ve düyûn-ı mîriyyeleri te’diye ve teslîm olunmak esnâf-ı mezkûrenin bâ-fermân-ı âlî şürût-ı nizâmlarından olduğuna binâen gedik-i mezkûrdan mesfûrânın hisseleri lede’l-müzâyede ve gıbbe inkıtâ‘i’r-rağbe sekiz bin beş yüz yetmiş dört guruşda hissedârları mersûm Kasper zimmî üzerinde karâr edip ziyâde ile tâlib-i âharları zuhûr etmeyip meblağ-ı mezkûr hisse-i gedik-i mezkûrun el-yevm semen-i misli idiği ihbâr olunmağla ben gedik-i mezkûrun hisse-i merkūmelerini tarafeynden îcâb ve kabûlü hâvî bey‘-i kat‘î ve safka-i vâhide ile mersûm Kasper zimmîye sekiz bin beş yüz yetmiş dört guruşa bey‘ ü temlîk ve lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz edip semen-i mezkûr sekiz bin beş yüz yetmiş dört guruşu mâlından tamâmen bana def‘ ü teslîm ve ben dahi yedinden ahz u kabz ve Zahîre hazînesine teslîm etmemle fîmâ-ba‘d gedik-i mezkûrun hisse-i mezbûreleri müşteri-i mersûm Kasper zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu] Fî 18 Ca sene 1247 Şuhûdü’l-hâl: Nizam ustalarından es-Seyyid Mustafa Ağa, el-Hâc Ahmed Ağa b. el-Hâc Said, Salıcı Abdülkadir. Mikail v. Kigor zimmî, Haçuk v. Agop zimmî, Filibos v. Agop.