İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 326 Hüküm no: 303 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Nikola’nın dükkân gediği hissesini Bakkal Vasil’e sattığı Bakkāl Asıl hüccet târîhi fî selhi S sene 1240 İşbu sebt-i hâmiş olunan hüccetde mastûrü’l-ism Nikola v. Filip nâm zimmî meclis-i şer‘-i hatîrde bakkāl tâifesinden işbu bâ‘isü’s-sifr Vasil v. Yorgi nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin İstanbul kādıları fazîletlü semâhatlü efendiler hazretleri nezâretinde âsûde evkāfdan merhûme Neslişah Sultan Vakfı musakkafâtından İstanbul’da Edirnekapısı kurbünde Sultan mahallesinde kâin İmâm dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden ber-mantûk-ı hüccet [59b] mâlik olduğum altmış sehm hisse-i şâyi‘amı tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim izniyle mersûm Vasil zimmîye bin guruşa bey‘ ü temlîk ve lâyıkı vech üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr bin guruşu bana tamâmen def‘ ü teslîm ve ben dahi yedinden ahz kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm hisse-i gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Vasil zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Ca sene 1247 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi ve gayruhum Kabzımâl Sava, Yazıcı Dimitri, Yuvakim v. Simyon.